Batys Qazaqstan oblysynyń ákimi Altai Kólginov jýrnalisterge qandai qyzmettik kólikpen júretinin jáne aldaǵy ýaqytta qandai kólik satyp alatynyn aitty, dep xabarlaidy Baq.kz tilshisi.
«Qyzmettik kólik týraly buǵan deiin talqyladyq. Memleket aqshasyn únemdeý maqsatynda qyzmet kóligin satyp almadym. Biz ony jaldap otyrmyz. Nemis mashinasy Audi-di jaldaimyz. Aiyna – 250 myń teńge. Jańa mashina 40-50 million tursa, bul áldeqaida arzanǵa túsedi. Qazaqstandyq mashinalarǵa qaraǵanda da jaldaý arzan. KIA-ǵa tapsyrys berdik. Jańa jyldan bastap qazaqstandyq mashinaǵa otyramyz», - dep málimdedi Altai Kólginov.
Oblys ákimi jańa temir tulpardyń baǵasyn aitpady. Ár bes jyl saiyn texnikaǵa, jol kólik apatyna bailanysty avtokólikti jańartyp turý keregin atap ótti.
«Sapasy da, baǵasy da kóńilge qonarlyq bolsa, qazaqstandyq avtokólikterdi satyp alýǵa bolady. Bizdiń avtoónerkásip damyp keledi, bolashaǵy bar dep oilaimyn», - dep sózin túiindedi Altai Kólginov.
Esterińizge sala keteiik, jaqynda ǵana Astana qalasynyń ákimdigi 55 mln teńgege kólik satyp alǵanyn málimdegen bolatyn.
