Elorda ákimi Altai Kólginov turǵyndardy karantin sharalary men sanitariia normalaryn qatań saqtaýǵa shaqyrdy. Bul týraly ol Instagram-paraqshasynda jazdy, dep habarlaidy "Ult aqparat".
«Qosymsha karantindik sharalar men shekteýlerdi engizý qalanyń qai «aimaqta» ornalasqanyna bailanysty. Qazir elorda «jasyl aimaqta», biraq sońǵy kúnderi COVID-19 aýrýynyń ósimi baiqalady. Eger 19 qazanda 13 jaǵdai tirkelse, 20 qazanda – 29, al 21 qazanda 15 jaǵdai tirkeldi. Dinamika turaqsyz.
Birinshi. Qazir COVID-19 indetiniń alǵashqy tolqyny kezindegidei aýrýdy ýshyqtyryp almaý asa mańyzdy. Ol kezde kovid statsionarlaryn birinen soń birin ashtyq, palatadaǵy tósek-oryndar sanaýly saǵatta tolyp ketetin. Bosańsýǵa bolmaidy, sebebi virýs eshqaida ketken joq, ol áli bar.
Dárigerlerdiń aitýynsha, eger adam bir aýyryp tursa, bul onyń virýsqa qarsy immýniteti bar degen sóz emes. Eger naýqas koronavirýsty bir ret jeńse, bul onyń qaýipsizdikte ekenin bildirmeidi. Ǵalymdar áli kúnge deiin koronavirýstyń qandai zardaby bar ekenin anyqtap jatyr.
Ekinshi. Qazir biz keibir kafe, meiramhana men basqa da nysandardyń karantindi buzyp, koronavirýstyń beibereket taralýyna jaǵdai jasap jatqanyn kórip otyrmyz. Osyǵan bailanysty biz reidter ótkizýdi kúsheittik.
Úshinshi. Bizdiń dárigerler tájiribe jinady, meditsinalyq mekemeler de daiyn. Biraq ózińizge eksperiment jasaý ne kerek. Tósek oryndar qajet bolǵan jaǵdaida, myńdaǵan oryndy daiyndai alamyz. Degenmen, barlyǵyna bir mezgilde dárigerler jetpeidi. Jabdyqtalǵan statsionarlar meditsina qyzmetkerlerinsiz patsientterdi emdei almaidy. COVID-19 indetimen bailanysty osyndai qaýipti jaǵdaida otpen oinaýǵa bolmaidy, «men aýyrmaimyn» dep oilamańyz – ózińiz ben jaqyndaryńyzdy koronavirýstan saqtańyz. Eń álsiz top – egde jastaǵy adamdar, biz olardy qorǵaýymyz kerek.
Infektsiiamen kúresý úshin biz meditsinalyq mekemelerdi qajetti qural-jabdyqpen, dári-dármekpen, qorǵanysh zattarymen qamtamasyz ettik. Sońǵy aptalarda qosymsha 50-den astam ókpeni jasandy jeldetý apparatyn (buryn satyp alynǵandarmen birge ÓJJ apparattarynyń sany 434-ti quraidy), 2 kompiýterlik tomografiia apparatyn (qalada barlyǵy 19 KT), ókpeniń qansha protsentke zaqymdanǵanyn kórsetetin 7 tsifrlyq rentgenografiia júiesin satyp aldyq (Qalada barlyǵy 63 rengten). Buǵan deiin meditsina mekemelerine ottegi kontsentratorlary, floýmetrler men taǵy basqalar qoiyldy.
Jedel meditsinalyq járdem stantsiiasynyń avtoparki eki ese - 64 mashinadan 130-ǵa deiin ulǵaityldy. Jedel járdem mashinalarynyń taǵy bir partiiasyna qosymsha tapsyrys berdik. 1,5 myń meditsina qyzmetkerinen rezerv qalyptastyryldy. Osy baǵyttaǵy jumystar jalǵasýda.
Tórtinshi. Biz Eýropa elderindegi iri qalalar karantindi kúsheitip jatqanyn kórip otyrmyz. Biz birinshi tolqynnan sabaq alýymyz kerek! Jazda ár otbasy derlik koronavirýsqa qatysty jaǵdaidy baqylap qana qoimady: tanystary, áriptesteri, dostary, týystary aýyrdy. Sanitariia normalaryn qatań saqtap qana indettiń órshýine jol bermeýge bolady.
Meditsina qyzmetkerleri segiz ai boiy koronavirýspen kúreste aldyńǵy shepte júr. Bizdiń mindetimiz – dárigerlerge júktemeni odan ári kóbeitpeý, jaqyndarymyz ben týystarymyzǵa juqtyrmaý, óitkeni ǵylym naýqastardyń bolashaqta qandai saldarǵa tap bolatynyn áli tolyq anyqtaǵan joq. Ózińizdi jáne jaqyndaryńyzdy qorǵańyz!», - dep jazdy Altai Kólginov.
