Astana soty «Muqalmas» respýblikalyq qoǵamdyq birlestigi otyrysynyń Nurjan Áltaevti prezidenttikke kandidat etip usyný týraly hattamasyn jaramsyz dep taný týraly talabyn qanaǵattandyrdy, dep habarlaidy QazAqparat Astana qalalyq sotynyń resmi saityna silteme jasap.
«Astana qalasy «Baiqońyr» aýdanynyń soty respýblikalyq qoǵamdyq birlestiktiń (RQB) jalpy jinalys hattamasyn jaramsyz dep taný týraly talap-aryzy boiynsha azamattyq isti qarady.
Talapkerler óz talaptaryn 2022 jylǵy 6 qazandaǵy RQB jinalysynyń qorytyndysy boiynsha Á. jáne oǵan jaqyn adamdar RQB-nyń basqa músheleriniń kómegimen birlestik músheleriniń daýys berýiniń beinejazbasyn negizdemege qosa bere otyryp, QR Ortalyq sailaý komissiiasyna tirkeýge óz erkimen Á.-niń kandidatýrasyn berýge niettenip, daýys berý qorytyndysy men hattamany burmalap jibergenine negizdedi.
Jaýapker talappen kelispedi jáne talapkerdiń dálelderine qaramastan, RQB músheleriniń jalpy jinalysynyń sheshimimen kópshilik daýyspen Á.-ni RQB atynan usyný týraly sheshim qabyldandy dep óz ustanymyn talap etti», - dep jazylǵan resmi málimette.
Resmi saittaǵy málimetke qaraǵanda, respýblikalyq qoǵamdyq birlestik atynan prezidenttikke kandidat usyný kezinde birlestiktiń Jarǵysyna qaishy áreketter jasalǵan.
«Jarǵynyń 33-tarmaǵyna sáikes barlyq sheshimder jalpy jinalysqa qatysýshylardyń jalpy sanynyń qarapaiym kópshilik daýsymen qabyldanady.
Jarǵynyń 31-tarmaǵynda, eger onyń jumysyna birlestiktiń óńirlik filialdarynyń (ókildikteriniń) jartysynan astamynyń ókilderi qatyssa jáne jinalysqa qatysýshylardyń jalpy sany keminde 40 adamdy qurasa, jalpy jinalys zańdy dep tanylady.
Sotta jalpy jinalysta Á-niń kandidatýrasyn usynýǵa – 6 adam, qarsy – 11 adam daýys bergeni anyqtaldy.
Osylaisha, jalpy jinalysty ótkizý kezinde RQB músheleriniń kópshiligi kezekten tys prezident sailaýynda RQB atynan kandidat retinde Á-niń usynylýyna «qarsy» daýys berdi.
Sot jalpy jinalys hattamasy RQB Jarǵysynyń 31 jáne 33-tarmaqtarynyń talaptaryna qaishy keledi jáne shyndyqqa janaspaidy degen qorytyndyǵa keldi.
Sonymen qatar, jalpy jinalysqa RQB músheleri bolyp tabylmaityn jáne daýys berý quqyǵy joq adamdar qatysty jáne daýys berdi», - dep jazady Astana sotynyń saity.
Eske salsaq, Ortalyq sailaý komissiiasy 7 qazan kúni prezidenttikke úmitker retinde usynylǵan Nurjan Áltaevtiń qujattary burmalaný faktisine tekserilip jatqanyn málim etken edi. Al 12 qazanda «Muqalmas» birlestigi Nurjan Áltaevtyń sailaýǵa túsýine qarsylyq bildirip sotqa júgingeni habarlandy.
