Tanymal meditsinalyq professor Almaz Sharman koronavirýs infektsiiasyn juqtyryp almaýǵa qatysty aqyl-keńesimen bólisti, dep habarlaidy "Ult aqparat".
«Koronavirýs infektsiiasynyń taralýy pandemiiaǵa tán sipatqa ie bolyp bara jatqan sekildi. Qazirdiń ózinde tiisti qorǵanys sharalaryn qabyldaý kerek. Eń aldymen aiǵai-súreń men jalǵan aqparlarǵa senbeýge shaqyrar edim. Shynaiy aqparatqa súienip, infektsiianyń qandai jolmen taraitynyn anyqtap alǵan abzal. Koronavirýs juqtyrǵan adammen jaqyn qarym-qatynasta bolǵan jaǵdaida jótel nemese túshkirý kezinde, iaǵni aýa arqyly quramynda virýsy bar silekei arqyly juǵady. Bul tamshylar kisiniń janynda turǵan adamǵa jetip, qasyndaǵy adam ony jutyp qoiýy múmkin», - dep jazady Almaz Sharman Facebook paraqshasynda.
Onyń aitýynsha, virýsy bar adamnan 2 metr ǵana qashyqtyqta turǵan kisi 10 minýttyń ishinde ózi de koronavirýs infektsiiasyn juqtyrýy múmkin.
«Sonymen birge, virýsty tamshylar ártúrli zattardyń betine de, máselen avtobýstyń oryndyǵyna, kitap pen klaviatýraǵa, tintýirge shashyraýy yqtimal. Sol úshin árdaiym qolyńyzdy taza sýmen jýyp otyrǵan jón. Alaqandy ysqylai jýyp, býynnyń syrtqy bóliginde, saýsaqtar men tyrnaq ishin de tazalap otyrý kerek. Qoldy shamamen 20 sekýndtan artyq jýý kerek. Jótelgen nemese túshkirgen kezde murnyńyz ben aýzyńyzdy meilinshe salfetkamen jabýǵa tyrysyńyz. Qoldanylǵan salfetkany birden laqtyryp otyrý kerek. Eger qasyńyzda salfetka bolmasa, aýzyńyzdy alaqanyńyzben emes, shyntaqpen jabýǵa tyrysyńyz», - deidi professor.
Budan bólek Almaz Sharman qarapaiym meditsinalyq maskalar jetkilikti dárejede qorǵai almaitynyn aitady.
«Alaida maskalar kishkentai aerozoldy bólikterden saqtai almaidy. Sonymen qatar maska kózdi de qorǵai almaidy. Kóz arqyly da virýs aǵzaǵa enip ketýi yqtimal. Basqasha aitqanda maskalar koronavirýs infektsiiasynan jetkilikti dárejede qorǵai almaidy», - dedi ol.
