تانىمال مەديتسينالىق پروفەسسور الماز شارمان كوروناۆيرۋس ينفەكتسيياسىن جۇقتىرىپ الماۋعا قاتىستى اقىل-كەڭەسٸمەن بٶلٸستٸ, دەپ حابارلايدى "ۇلت اقپارات".
«كوروناۆيرۋس ينفەكتسيياسىنىڭ تارالۋى پاندەميياعا تەن سيپاتقا يە بولىپ بارا جاتقان سەكٸلدٸ. قازٸردٸڭ ٶزٸندە تيٸستٸ قورعانىس شارالارىن قابىلداۋ كەرەك. ەڭ الدىمەن ايعاي-سٷرەڭ مەن جالعان اقپارلارعا سەنبەۋگە شاقىرار ەدٸم. شىنايى اقپاراتقا سٷيەنٸپ, ينفەكتسييانىڭ قانداي جولمەن تارايتىنىن انىقتاپ العان ابزال. كوروناۆيرۋس جۇقتىرعان اداممەن جاقىن قارىم-قاتىناستا بولعان جاعدايدا جٶتەل نەمەسە تٷشكٸرۋ كەزٸندە, ياعني اۋا ارقىلى قۇرامىندا ۆيرۋسى بار سٸلەكەي ارقىلى جۇعادى. بۇل تامشىلار كٸسٸنٸڭ جانىندا تۇرعان ادامعا جەتٸپ, قاسىنداعى ادام ونى جۇتىپ قويۋى مٷمكٸن», - دەپ جازادى الماز شارمان Facebook پاراقشاسىندا.
ونىڭ ايتۋىنشا, ۆيرۋسى بار ادامنان 2 مەتر عانا قاشىقتىقتا تۇرعان كٸسٸ 10 مينۋتتىڭ ٸشٸندە ٶزٸ دە كوروناۆيرۋس ينفەكتسيياسىن جۇقتىرۋى مٷمكٸن.
«سونىمەن بٸرگە, ۆيرۋستى تامشىلار ەرتٷرلٸ زاتتاردىڭ بەتٸنە دە, مەسەلەن اۆتوبۋستىڭ ورىندىعىنا, كٸتاپ پەن كلاۆياتۋراعا, تٸنتۋٸرگە شاشىراۋى ىقتيمال. سول ٷشٸن ەردايىم قولىڭىزدى تازا سۋمەن جۋىپ وتىرعان جٶن. الاقاندى ىسقىلاي جۋىپ, بۋىننىڭ سىرتقى بٶلٸگٸندە, ساۋساقتار مەن تىرناق ٸشٸن دە تازالاپ وتىرۋ كەرەك. قولدى شامامەن 20 سەكۋندتان ارتىق جۋۋ كەرەك. جٶتەلگەن نەمەسە تٷشكٸرگەن كەزدە مۇرنىڭىز بەن اۋزىڭىزدى مەيلٸنشە سالفەتكامەن جابۋعا تىرىسىڭىز. قولدانىلعان سالفەتكانى بٸردەن لاقتىرىپ وتىرۋ كەرەك. ەگەر قاسىڭىزدا سالفەتكا بولماسا, اۋزىڭىزدى الاقانىڭىزبەن ەمەس, شىنتاقپەن جابۋعا تىرىسىڭىز», - دەيدٸ پروفەسسور.
بۇدان بٶلەك الماز شارمان قاراپايىم مەديتسينالىق ماسكالار جەتكٸلٸكتٸ دەرەجەدە قورعاي المايتىنىن ايتادى.
«الايدا ماسكالار كٸشكەنتاي اەروزولدى بٶلٸكتەردەن ساقتاي المايدى. سونىمەن قاتار ماسكا كٶزدٸ دە قورعاي المايدى. كٶز ارقىلى دا ۆيرۋس اعزاعا ەنٸپ كەتۋٸ ىقتيمال. باسقاشا ايتقاندا ماسكالار كوروناۆيرۋس ينفەكتسيياسىنان جەتكٸلٸكتٸ دەرەجەدە قورعاي المايدى», - دەدٸ ول.
