Almaty ákimi Baqytjan Saǵyntaev taý týrizmi qaýipsizdigin qamtamasyz etý boiynsha qabyldanatyn sharalar týraly aitty, dep habarlaidy "Ult aqparat".
Qala ákimi B. Saǵyntaev Instagram paraqshasynda Almaty taýlarynda týristerdiń qaýipsizdigin qamtamasyz etý úshin baqylaý-qutqarý pýnktteriniń ashylatynyn jáne taý soqpaqtaryn abattandyrý jumystarynyń jalǵasatynyn jetkizdi.
«Óziniń tańǵajaiyp tabiǵatymen máshhúr Ile Alataýynyń taýlary almatylyqtar men qala qonaqtary úshin kórikti ári tartymdy mekenniń biri. Osy oraida taýda qaýipsizdik sharalaryn saqtaǵan jón. Biz óz kezegimizde osyndai joryqtardyń qaýipsizdigin qamtamasyz etý úshin infraqurylymdy jaqsartý boiynsha jumystardy qolǵa aldyq», - dedi B. Saǵyntaev.
Onyń aitýynsha, Almatynyń taý klasterin damytý aiasynda myń shaqyrymnan astam taý baǵyttary tsifrlandyryldy. Onyń ishinde jalpy uzyndyǵy 500 shaqyrym bolatyn 36 baǵyt abattandyryldy.
«Qazirdiń ózinde myń shaqyrymnan astam taý marshrýttaryn tsifrladyq, onyń jalpy uzyndyǵy 500 km bolatyn 36-sy abattandyryldy. Marshrýttardyń shemasy, onyń kúrdeliligi kórsetilgen aqparattyq stendter ornatyldy. 2021 jyly 120 shaqyrymǵa jetetin taý joly abattandyrylmaq. Kishi jáne Úlken Almaty shatqalynda eki baqylaý-qutqarý pýnktiniń qurylysy qarastyrylǵan. 16 taý qutqarýshysy táýlik boiy kezekshilik etedi», - dep jazdy B. Saǵyntaev.
Almaty ákimi shalǵai ornalasqan 14 toraptyq ýchaskelerde týristerdiń kúrdeli aýa raiy jaǵdailaryn kúte alatyn arnaiy qorǵaný oryndarynyń uiymdastyrylatynyn aitty.
«Shalǵaida ornalasqan 14 toraptyq ýchaskede kúrdeli aýa raiy jaǵdailaryn kútýge bolatyn jasyryný oryndaryn uiymdastyramyz. «Tuiyq sý» shatqalynda tikushaq alańyn qurý josparda bar. Túrli núktelerde dabyl túimeleri bar 10 radiorelelik dińgekterdi ornatý jáne «Tau Go» smart-navigator qosymshasyn ázirleý kózdelgen», - dedi B. Saǵyntaev.
«Shymbulaq» taý kýrorty vizit-ortalyqtarynyń bazasyndaǵy jáne «Medeýdiń» bazalyq stansasyndaǵy taý betkeilerinde saqtyq erejelerin kúsheitý úshin taýǵa shyǵar aldyndaturaqty túrde nusqaýlyqtar ótkiziledi, kásibi gidtarmen ekskýrsiia júrgiziledi.
