Megapolistiń eki millionynshy turǵyny Aiala Jambyldyń otbasy qonys toiyn toilaidy. Qala kúni olarǵa Almaty qalasynyń ákimi Baqytjan Saǵyntaev jańa páterdiń kiltin tapsyrdy, dep habarlaidy QazAqparat.
Aiala Jambyl 2021 jyly 21 maýsymda dúniege keldi jáne Ulttyq statistika biýrosynyń málimeti boiynsha ol Almatynyń eki millionynshy turǵyny boldy.
Mereke kúni qala ákimi Baqytjan Saǵyntaev Aialanyń ata-anasyna Naýryzbai aýdanyndaǵy «Alma Siti-5» turǵyn úi keshenindegi úsh bólmeli jańa páterdiń kiltin tapsyrdy.
Qala ákimi otbasyna zor densaýlyq, baqyt pen bereke tiledi.
Qala kúni alty bala ósip kele jatqan Jambyl otbasy úshin qýanyshty kúnge ainaldy. Jergilikti atqarýshy organdardyń qoldaýynyń arqasynda kópbalaly otbasynyń jeke baspana týraly armany oryndaldy.
Eki millionynshy almatylyq Aiala Jambyl politsiia qyzmetkeri Beibit Ábildaev pen balabaqsha tárbieshisi Áliia Janybekovanyń otbasynda dúniege keldi. Ol otbasyndaǵy altynshy qyz.
Buǵan deiin kópbalaly otbasy «Qarǵaly» shaǵynaýdanynda ata-anasynyń úiinde turǵan.
«Ana retinde balalarymnyń týǵan kúnderi eń baqytty sát bolsa, al búgin páter kiltin alý eshqashan umytylmaityn eń baqytty kún. Biz qaladan mundai syilyq alamyz dep kútpegen edik», - dedi Áliia Janybekova.
Aita keteiik, Almatyda jyl basynan beri kómekke muqtaj 2 340 otbasy jeńildetilgen nesie aiasynda turǵyn úimen qamtamasyz etildi.
