Almatynyń bas sanitarlyq dárigeri Jandarbek Bekshin sanitarlyq-epidemiologiialyq talaptardy oryndamaityn jastarǵa eskertý jasady, dep habarlaidy QazAqparat.
Jandarbek Bekshinniń aitýynsha, KVI boiynsha ósim 1,1 ese bolyp otyr. «Birinshi aptada – 420 jaǵdai, ekinshi aptada – 460 jaǵdai, úshinshi aptada – 510 jaǵdai, tórtinshi aptada - 560 jaǵdai tirkeldi. Optimistik jaǵdaida jeltoqsan aiyn 1900 jaǵdaimen, pessimistik boljamda 2100 jaǵdaimen aiaqtaimyz. Biz qazir Ispaniia, Ulybritaniia, Frantsiia, Germaniia elderin mysalǵa keltiremiz. Virýsty ustap alyp, qamap qoia almaisyń. Osyny eresek adamdar eskerýi kerek»,- dedi Jandarbek Bekshin.
Mamannyń aitýynsha, koronavirýs jastarda simptomsyz ótetindigimen qaýipti.
«Jastar ata-analaryna, qart kisilerge juqtyrýy múmkin. Bizdiń aitqan eskertpelerimdi qulaqqa ilmegen adam Jańa jyldy ata-anasyz, ata-ájesiz qarsy alýy ǵajap emes», - dedi ol.
