Almaty Ortalyq meshitiniń Bas imamy Erkinbek Shoqaev meningokokk virýsyna bailanysty málimdeme jasady, - dep habarlaidy "Ult aqparat".
Bas imam adamnyń túrli jaǵdailary men kúiin eskere otyryp qajettilik týyndaǵan kezderde orazasyn úzip, keiinirek qaita óteýine Quranda ruqsat berilgenin aita ketti.
"Ramazan – árbir múminniń asyǵa kútetin bereke men meiirimge toly ai. Bul aidyń árbir sátterinde kúlli álemge Alla Taǵalanyń raqymy úzdiksiz tógilip turatyny aqiqat. Sol berekeli sátterden quralaqan qalmaýymyz úshin shamamyz kelgenshe Allanyń paryzyn oryndap, oraza ustaitynymyz belgili. Alaida, Alla Taǵala adam balasyna tek qana jeńildik qalaitynyn, aýyrlyq qalamaitynyn esten shyǵarmaýymyz qajet. Sol úshin Alla Taǵala adamnyń túrli jaǵdailary men kúiin eskere otyryp qajettilik týyndaǵan kezderde orazasyn úzip, keiinirek qaita óteýine Quranda ruqsat berdi. Sebebi, bizdiń dinimiz eshbir ýaqytta, eshkimge aýyrlyqty júktemeidi. Kerisinshe qoǵamnyń ósip-órkendeýine qolaily jaǵdai jasap, adamzattyń ómirin jeńildetetin din", - delingen habarlamada.
Búgingi tańda qalamyzdaǵy meningokokk virýsynyń tirkelý oqiǵalary jiileýin jáne birneshe adamnyń osy aýrýdan qaza bolǵanyn eskere otyryp, eger boiymyzda menigittiń belgileri baiqalǵan bolsa, ýaqyt ozdyrmai dereý dárigerlerge qaralyp, qajet bolsa orazany ashýǵa shariǵat ruqsat etedi.
"Ramazan aiynda naqty aýyrǵan kisiniń oraza ustaýy aýrýdyń asqynýyna, emniń keshigýine kedergi bolǵan jaǵdaida oǵan orazasyn ashýǵa bolady. Orazanyń aýrý kisige ziiandy ekeni ne óziniń burynǵy tájiribesinen, ne bilikti dárigerdiń nusqaýymen anyqtalýy qajet. Ustamaǵan kúnderiniń qazasyn sońynan basqa ailarda saýyqqanda óteidi. Qatty naýqas kisiniń: "Aýyrsam da ustai beremin", - dep sheshim jasaýy durys emes. Sebebi, densaýlyq Alla Taǵalanyń adam balasyna bergen amanaty, oǵan qiianat jasaýǵa bolmaidy. Biz qala turǵyndaryn óz densaýlyqtaryn saqtaýǵa, amanatqa qiianat etpeýge shaqyramyz", - delingen Bas imamnyń úndeýinde.
