Áýezov aýdany «Halyq qatysatyn biýdjet» baǵdarlamasynyń aiasynda qoǵamdyq keńistikti birtindep abattandyryp jatyr. Óńirlik kommýnikatsiialar qyzmeti uiymdastyrǵan baspasóz týry barysynda osy jobanyń júzege asý barysyn BAQ ókilderine tanystyryp shyqty.
Nysandardyń biri – Tastaq-1 shaǵynaýdany, №6 turǵyn úidiń aýlasy. Aýdan ákimdigi apparatynyń málimetinshe, jalpy aýmaǵy 920 sharshy metrdi qamtityn joba 1200-den astam turǵynǵa arnalypty.
Nysan 85 paiyzǵa daiyn tur. Munda qazir jabyn tósep, shaǵyn sáýlet nysanyn ornatyp, aýmaqty abattandyryp jatyr. Joba aiaqtalǵannan keiin aýlada balalardyń oiyn alańy, 22 shaǵyn sáýlet nysany, jańa oryndyqtar men qoqys jáshigi, jaryqtandyratyn jáne baqylaý júiesi ornatylady.
Kelesi jol túsken jer Tastaq-1 shaǵynaýdanyndaǵy №7 men №8 turǵyn úidiń arasyndaǵy jańa saiabaq boldy. Bul joba da «Halyq qatysatyn biýdjet» baǵdarlamasymen qolǵa alynyp, 1200-den astam turǵynǵa arnalypty.
Saiabaqta oiyn alańyn salý, shaǵyn sáýlet nysandaryn, jaryqtandyrý men baqylaý júiesin ornatý josparlanǵan. Sondai-aq kógaldandyrýǵa erekshe kóńil bólinedi: aýmaqqa shamamen 5 myń buta men 2 myń sharshy metrge jasyl jelek egilip, avtomatty sýarý júiesi iske qosylady.
Áýezov aýdanynyń ákimi Abzal Egemberdievtiń aitýynsha, «Halyq qatysatyn biýdjet» baǵdarlamasy turǵyndarǵa qalalyq ortany damytýǵa tikelei yqpal etýge múmkindik beredi.
«Bulardyń barlyǵy turǵyndardyń ózi kótergen bastama. Bizdiń mindetimiz – turǵyndardyń úiine jaqyn jerde jaily ári qaýipsiz qoǵamdyq keńistik qalyptastyrý. Qazir jumys kestege sáikes istelip jatyr. Jaqyn ýaqytta turǵyndar demalyp, balalarymen ýaqyt ótkizip, sportpen ainalysa alatyn jańa aýlalar men saiabaqtardy paidalanýǵa beremiz», – dedi aýdan ákimi.
Onyń aitýynsha, aýla men qoǵamdyq keńistikti abattandyrý aýdandy damytýdyń basym baǵytynyń biri bolyp otyr eken. Jobalardy iske asyrý barysynda jańa demalys ornyn qurýmen qatar qaýipsizdikke, jaryqtandyrýǵa, kógaldandyrýǵa kóp kóńil bólinip otyr.
Eki joba da biylǵy jyldyń mamyr aiynda bastaldy. Bekitilgen kestege sáikes, qurylys pen abattandyrý jumys biylǵy 25 tamyzda aiaqtamaqshy.
Nysandar paidalanýǵa berilgennen keiin Tastaq-1 shaǵynaýdanynyń turǵyndary jaily qalalyq ortanyń talabyna sai keletin osy zamanǵy qoǵamdyq keńistikti paidalaný múmkindigine ie bolady.
