Almatylyqtar kórshiles jatqan Qytaidaǵy jer silkinisin sezindi, dep habarlaidy "Ult aqparat".
Jer silkinisi Astana ýaqyty boiynsha 5:27-te tirkeldi. 4 ball jerasty dúmpýlerin almatylyqtar, taldyqorǵandyqtar jáne Jarkent turǵyndary sezingen. Zilzalanyń oshaǵy Almatydan 490 km jerde, ShUAÓ aýmaǵynda bolǵan. Eýropa seismologiialyq ortalyǵynyń derekteri boiynsha, zilzala qýaty 6,4 baldy qurady.
QR IIM TJK resmi ókili Rýslan Imanqulovtyń aitýynsha, qazirgi ýaqytta apattan qandai da bir qirandy nemese zardap shekkender jaily málimet túspegen.
"Osyǵan uqsas jerasty dúmpýleri Almatyda 2011 jyly, al keiinirek 2013 jyly tirkeldi. Eki jaǵdaida da jer silkinisiniń magnitýdasy shamamen 4-5 ballǵa teń boldy", - dedi Ánýar Boranbaev.
Sondai-aq, "Seismologiia institýty" JShS direktorynyń aitýynsha, bul magnitýda qalypty dep sanalady.
"Muny "joiqyn" jer silkinisi dep aitýǵa bolmaidy", - dep túsindirdi Boranbaev.
Eske sala keteiik, Qytaidyń Sychýan provintsiiasynda jergilikti ýaqyt boiynsha 21.19-da 6,5 baldyq jer silkinisi tirkelgen. Shamamen 12 adam tabiǵi apattyń qurbany boldy, zardap shekkender sany 175-ke jetti.
28 adam aýyr hálde jatyr. Izdeý-qutqarý operatsiialaryna qutqarýshylar men dárigerler ǵana emes, QHR qarýly politsiiasynyń 1300-den astam qyzmetkeri at salysýda.
Jer silkinisi jergilikti ýaqyt boiynsha 21.19-da (Astana ýaqyty boiynsha 19.19-da) Ngava-Tibet-Tsian avtonomdy okrýgynyń Tsziýchjaigoý ýezinde bolǵan. Sodan keiin 100-den astam aftershok tirkeldi.
Joiqyn jerasty dúmpýi saldarynan Tsziýchjaigoý ulttyq parkindegi "Tiantan" qonaq úii qirady, onda 2 myń týrist turyp jatqan. Ǵimarattan 500 adam qaýipsiz jerge shyǵaryldy.
Aldyn ala málimetter boiynsha, Qytaidaǵy jer silkinisinen zardap shekkender arasynda qazaqstandyqtar joq.
