Almatynyń Naýryzbai aýdanynyń turǵyndary krannan qurttarmen birge aqqan las sýǵa shaǵymdanýda. Máselege qatysty «Almaty Sý» mekemesi túsinik berdi, dep habarlaidy QazAqparat.
«Qurt aralasqan las sý Naýryzbai aýdanyndaǵy Taýjoly yqshamaýdanynda shyqty. Sýdy eshqandai tazalamai, birden ózennen alatyn sekildi. Taýjolyndaǵy las sýdan nemese taza sýdyń joqtyǵynan sharshadyq. Búkil Naýryzbai aýdany sý máselesi boiynsha zardap shegýde», - delingen videoǵa berilgen jazbada.
«Almaty sý» MKK málimetinshe, Taýjoly yqshamaýdanyndaǵy úilerge «Almaty sý» jelisi boiynsha keletin sýdan eshqandai qospalar men biologiialyq elementter tabylǵan joq. Osy yqshamaýdanǵa keletin sýyq sýdyń sapasy basqa aýdandardaǵy siiaqty halyqqa arnalǵan aýyzsý parametrlerin retteitin normativtik qujattarǵa sáikes keledi.
«Degenmen, áleýmettik jelide taraǵan videoǵa bailanysty, sondai-aq videony taratýshy óz mekenjaiyn naqty aitpaǵan soń, kásiporyn mamandary atalǵan turǵyn úi massiviniń birneshe úiinen sý synamalaryn aldy.
Jinalǵan sý synamalaryna jasalǵan taldaý jáne «Almaty sý« MKK-nyń jaýapkershilik aimaǵyndaǵy Taýjoly yqshamaýdanynyń sýmen jabdyqtaý júiesin zertteý nátijeleri sýyq sýmen jabdyqtaý qyzmeti boiynsha bekitilgen normalar men erejelerden qandai da bir aýytqýlar joq ekenin kórsetedi. Atalǵan yqshamaýdanda qalalyq sýmen jabdyqtaý júiesinen basqa, turǵyndar basqa qyzmet kórsetýshilerdiń sý qubyry jelilerin paidalanady. Endi osyǵan uqsas jaǵdailarda ýákiletti memlekettik organǵa júginýdi usynamyz», - dedi «Almaty sý» MKK-da.
