Ál-Farabi dańǵylyndaǵy Tuńǵysh Prezident saiabaǵy aýmaǵynda jaiylyp júrgen bir úiir jylqy almatylyqtardy ashýlandyrdy, - dep habarlaidy Tengrinews.kz agenttigi.
Naýryzbai aýdanynda ornalasqan "Han-Tengri" turǵyn úi kesheniniń turǵyndary jaǵdaiǵa nazar aýdarýdy suraidy. Qala turǵyndarynyń aitýynsha, jylqylar onda kún saiyn júredi.
"Qarǵaly yqshamaýdanynda attar kún saiyn júredi: "Han Tengri" turǵyn úi kesheninen prezidenttik saiabaqqa deiin. Nege bulai? Megapoliste, qala mańynda emes, qalanyń halyq tyǵyz ornalasqan bóliginde. Oǵan qosa, bul mańda mektepter de ornalasqan. Apattyq jaǵdai týǵyzady. Bul basqalarǵa qaýip tóndiredi. Shuǵyl shara qoldaný kerek", - dedi "Han Tengri" turǵyndarynyń biri.
Jergilikti turǵyndar politseiler mal iesimen sóileskenin aitady. Alaida almatylyqtar nátije kórmei otyr.
Qalalyq Politsiia departamenti jylqylardyń iesi buǵan deiin de birneshe ret ákimshilik jaýapkershilikke tartylǵanyn rastady. Ol bul joly da jazadan qutylmaǵan.
"Osy fakt boiynsha janýarlardyń iesi ÁQBtK-niń 505-baby 2-bóligi boiynsha ákimshilik jaýapkershilikke tartyldy. Naýryzbai aýdanynyń politsiia basqarmasy budan bylai buǵan jol bermeý týraly áńgime júrgizdi", - dedi vedomstvonyń baspasóz qyzmeti ókilderi.
