Almatylyqtar qala ortalyǵydaǵy qurylysqa shaǵymdandy, dep habarlaidy "Ult aqparat".
Nurmaqov kóshesinde ornalasqan № 81 úidiń turǵyndary qala biliginen aýladaǵy qurylysty toqtatýdy surady.
Almaty qalalyq josparlaý jáne ýrbanistika basqarmasynyń baspasóz qyzmetiniń málimetishe, qalanyń bas damý josparyna sáikes, Jambyl, Áitiev, Qabanbai batyr, Nurmaqov kóshelerindegi úilerdiń aýlasynda jańa eki ǵimarat salynyp jatyr.
Birinshi nysan - kópqabatty turǵyn úi.
«Bul jerde kópfýnktsionaldy turǵyn úi kesheni paida bolady. Qurylystyń eskizdik jobasy 2007 jyly maquldanǵan bolatyn. Alaida menshik iesiniń aýysýyna bailanysty qosymsha ruqsat 2020 jyly berildi. Burynǵy investordyń qarjysy jetpegendikten qurylys toqtap qalǵan. Osy úige aqsha salǵan almatylyqtardyń baspanasyz qalýy múmkin edi. Der kezinde investor tabylyp, másele sheshildi», - dep habarlady basqarmadaǵylar.
Ekinshi nysan - jerasty parkingi bar 12 qabatty qonaq úi kesheni bolmaq.
«Jobalaýǵa arnalǵan sáýlet-josparlaý tapsyrmasy 2014 jyly berildi. Al eskizdik jobasy 2016 jyly maquldandy. 2018 jyly nysan Qala qurylysy keńesi men memlekettik saraptamadan ótti. Qurylys QR aýmaǵynda qoldanylatyn qurylys normalary men erejelerine sáikes keledi», - dedi basqarma.
Almaty qalalyq josparlaý jáne ýrbanistika basqarmasy atap ótkendei, eki nysannan basqa, atalǵan aýmaqta eshqandai ǵimarat salynbaidy. Iaǵni, úshinshi ýchaskeniń iesine qurylys júrgizýge ruqsat berilgen joq.
