Almatylyqtar Denis Ten jaraqat alǵan jerge gúl shoqtaryn ákelýde, dep habarlaidy Ult.kz tilshisi QazAqparat agenttigine silteme jasap.
Qaiǵyly oqiǵaǵa ortaqtastyǵyn bildirip, qoldaryna gúl ustaǵandardyń qarasy artyp keledi. Oqiǵa bolǵan jerde 4-5 saǵat buryn jigittiń «Lexus GX» kóligi turǵan edi. Mashinany politsiia qyzmetkerleri zattyq aiǵaq retinde alyp ketti.
«Bul - tutas eldiń qazasy! Biz Olimpiada oiyndary kezinde únemi jankúier bolatynbyz. Kóz jasymdy tyiý múmkin emes. Denis meniń aǵammen aralasyp turatyn. Ol qazir Shymkentte. Habarlasyp aityp edim, birden gúl aparýymdy ótindi», - dedi Nikita Zakarin.
«Men ony tanymaitynmyn. Biraq, bulai bolǵany óte qorqynyshty. Mundai sumdyq azamattyq qoǵamda bolmaýy tiis», - dedi qala turǵyny Vladislav Bragin.
Qalalyq IID baspasóz qyzmetiniń habarlaýynsha, oqiǵa Qurmanǵazy Baiseiitova kósheleriniń qiylysynda búgin túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.Oqiǵanyń tergelýin QR Ishki ister ministri Qalmuhanbet Qasymov ta jeke baqylaýyna alǵan bolatyn.
