Almatyda qazaqtyń kórnekti jazýshysy Beiimbet Mailinniń 125 jyldyǵyna arnalǵan spektakl qoiyldy, dep habarlaidy "Ult aqparat".
Qoiylym Muhtar Áýezov atyndaǵy Qazaq memlekettik akademiialyq drama teatrynyń sahnasynda kórsetildi. Spektakldi tamashalaýǵa ǵalymdar, ziialy qaýym ókilderi, jazýshynyń urpaqtary, ustazdar men jastar keldi.
Iliias Omarov atyndaǵy Qostanai oblystyq qazaq drama teatrynyń ártisteri kórermenderge jazýshynyń balalyq shaǵyn, jas kezin jáne ómiriniń sońǵy jyldaryn kórsete aldy. Bas keiipkerdiń rólin Nurlan Baishin somdady.
«Spektaklde onyń ómirbaiany kóp baiandalady. Ártister jazýshy ómiriniń sońǵy jyldaryn kóremenderge shynaiy kórsetip, sheber jetkize bildi. Ol kezde onyń shyǵarmalaryn Muhtar Áýezov, Iliias Jansúgirov, Sáken Seifýllin jáne basqa da kórnekti tulǵalar joǵary baǵalaǵan», - deidi Qazaqstan Jazýshylar odaǵy tóraǵasynyń orynbasary Baýyrjan Jaqyp.
Pesanyń rejisseri Áliia Baimahan bul qoiylym qazaqtyń kórnekti jazýshysy Beiimbet Mailinniń shyǵarmashylyq murasy ulttyq biregeilikti saqtaýǵa, óskeleń urpaqtyń boiynda rýhani-aǵartýshylyq qundylyqtardyń damýyna yqpal etetindigin atap ótti.
«Biz kóptegen zertteýler júrgizdik, kitaphanalar men muraǵattardan aqparat izdedik, ártúrli adamdarmen sóilestik. Biz onyń ómirin tek jazýshy retinde ǵana emes, sonymen birge kúieý, áke retinde de kórsetkimiz keldi. Jastar óz tarihyn umytpaýy kerek jáne taý tulǵalar týraly bilýi tiis. Bul óte mańyzdy. Jazýshynyń ómiri qiyn jáne túrli oqiǵalarǵa toly boldy, ol kóptegen jaǵdailardy bastan ótkerdi. Beiimbet Mailin óz halqynyń, óz eliniń naǵyz patrioty bolǵan dep sanaimyn», - dedi rejisser.
Qoiylym sońynda, Beiimbet Mailinniń nemeresi Dámen Seiitjanova akterler men kórermenderge alǵysyn bildirdi.
Buǵan deiin, spektakl premerasy Qostanai oblysynda jazýshynyń týǵan jerinde qoiylǵan bolatyn. Aldaǵy ýaqytta elimizdiń basqa aimaqtarynda kórsetiledi.
