Almatydaǵy Medeý aýdanynyń politseileri AQSh azamatshasyna aqshasyn qaitaryp alýǵa kómektesti, - dep habarlaidy "Ult aqparat" qalalyq IID baspasóz qyzmetine silteme jasap.
Politseilerge belgisiz jekemenshik taksi júrgizýshisiniń sheteldikti Almaty halyqaralyq áýejaiynan "Qazaqstan" qonaqúiine deiin 40 myń teńgege jetkizgeni jaily habar kelip túsken.
"Bul týraly birinshi bolyp qonaqúi qyzmetkerleri habarlady. Olar 102 pýltine habarlasty. Jekemenshik júrgizýshiniń aty-jóni birden anyqtaldy. Er adam sheteldik azamatshanyń qalany bilmeitinin paidalanyp, baǵany kótergen. Nátijesinde júrgizýshi 53 jastaǵy áielge aqshasyn qaitardy. Áiel, óz kezeginde, qazaqstandyqtarǵa kórsetken kómekteri úshin alǵys bildirdi", - dep habarlady Medeý aýdandyq IIB basshysy Bolat Totybaev.
Eske sala keteiik, biyl jazda Astanada da osyndai jaǵdai bolǵan edi. EKSPO kórmesine kelgen Vengriia azamatyn áýejaidan qalaǵa jetkizgen astanalyq taksi júrgizýshisi aldap ketken bolatyn.
