Almatyda ýchaskelik politsei aýrýshań kelinshektiń eki birdei páterin satyp jiberip, ózin Qyrǵyzstanǵa quldyqqa ótkizbekshi bolǵan, - dep habarlaidy Eýraziia birinshi arnasy.
Qaskói munysymen qoimai, onyń balasynyń kózin joiýǵa tyrysypty. Tártip saqshysynan kómek suraimyn dep, aqyrynda ómiri tyǵyryqqa tirelgen áiel endi kimge senerin bilmei dal. Al, búgin sot kelinshektiń senimine kirip, aram oiyn iske asyrmaqshy bolǵan burynǵy politsei men onyń sybailasyna úkim shyǵardy.
Áýezov aýdanynda ýchaskelik politsei bolǵan Arli Ońǵarbaevqa Tatiana Shýlgina 2015 jyldyń qyrkúiek aiynda kelip, burynǵy kúieýinen qorǵaýdy suraǵan. Inspektor kelinshekke óziniń aǵasyn ertip kelip, oqqaǵar bolady dep, úiine tirkeýge turǵyzǵan. Artynsha Ózbekstan azamaty Álisher Jańabaevty áieldiń senimine kirgizip, úilenetinine kózin jetkizedi. Osylaisha ekeýi birlesip kásip ashpaqshy bolyp, jalǵyzbasty kelinshekti bar dúnie-múlkinen aiyrǵan.
"Olar meni aldap, eki birdei páterimdi satýǵa májbúrledi. Kelisimshartqa qol qoiǵannan keiin meni shetelge shyǵaryp, qujatsyz, aqshasyz qaldyryp ketti. Ol jaqtan áreń qashyp keldim", - deidi jábirlenýshi Tatiana Shýlgina.
Ýchaskelik politseidiń aram piǵyly munymen shektelmegen. Kelinshekti Qyrǵyzstanǵa aparyp tastaǵan soń, qylmystyq top músheleri onyń jalǵyz ulynan qutylýdyń jolyn izdeidi. Sóitip ony Talǵar aýdanyna aparyp býyndyryp, pyshaqtaǵan. Alaida jas jigittiń jan daýysyn estigen turǵyndar ony qutqaryp qalypty.
Kóp uzamai Arli Ońǵarbaev pen onyń sybailasy Álisher Jańabaev qamaýǵa alynǵan. Al aǵasy Áset Ońǵarbaevqa izdeý jariialanǵan. Burynǵy politseige "asa iri mólsherde alaiaqtyq jasady", "aldyn ala sóz bailasý arqyly adam óltirýge oqtaldy jáne qylmystyq top qurdy", "laýazymyn asyra paidalandy" degen aiyptar taǵyldy. Al sybailasy alaiaqtyq jáne adam óltirýge oqtalý baptary boiynsha kúdikke ilingen.
Sotta Ońǵarbaev ózine taǵylǵan aiyptarmen múldem kelispedi, al Jańabaev kinásin ishinara moiyndady.
"Ývajaemyi sýdia! Ia nadeiýs na vashe spravedlivoe reshenie", - dedi sottalýshy Arli Ońǵarbaev.
"Sot myrza men sizdiń qaraýyńyzǵa kelisemin. Biraq men 99-bapqa kelispeimin. 107-baptyń birimen, 106-baptyń birine ǵana kelisemin", - deidi sottalýshy Álisher Jańabaev.
Alaida sot ekeýin de kináli dep tanyp, Ońǵarbaevty 16 jylǵa, Jańabaevty 12 jylǵa bas bostandyǵynan aiyrdy. Ekeýi jábirlenýshilerge 4 million teńge moraldyq shyǵyn óteitin boldy. Alaida baspanany keri qaitarý múmkin bolmady.
