Abai atyndaǵy Qazaq ulttyq opera jáne balet teatrynda Alberto Alonsonyń «Karmen siýitasy» baletiniń tusaýkeseri ótti, dep habarlaidy QazAqparat.
Almatyda Reseidiń halyq ártisi, Úlken teatrdyń prima-balerinasy, «La Skala» teatrynyń etýali Svetlana Zaharova óner kórsetti. Ol Almatyǵa alǵash ret 2012 jyly qarashada kelgen bolatyn. Sol kezde ol Rýslan Skvortsovpen «Jizel» spektaklinde oinady.
«Maiia Plitseskaia – ańyz adam. Men «Karmen – siýita» baletiniń premerasyn daiyndaý kezinde onymen biraz jumys isteý baqytyna ie boldym. Bul onyń mereitoilarynyń biri jáne Úlken teatrda atap ótildi. Sol kezde qoilymǵa Alberto Alonsonyń ózi kelgen bolatyn. «Karmen siýita» spektakli meniń ómirimdegi eń mańyzdy spektaklderdiń biri. Men ony kóptegen jyldar boiy álemniń ártúrli sahnalarynda bilep kelemin. Bul qoiylym áli de suranysqa ie jáne kórermen ony qýana tamashalaidy», - deidi prima-balerina.
Aita keteiik, 2021 jyldyń 30-31 qazanynda Almatyda aty ańyzǵa ainalǵan Maiia Plitseskaianyń 95 jyldyǵyna arnalǵan IV Halyqaralyq Ballet Globe, festivali «Aqqý kóli» spektaklimen ashyldy.
Ballet Globe festivaliniń negizin qalaýshy Erlan Andaǵulovtyń aitýynsha, festivaldiń basty maqsaty – halyqty balet óneriniń san qyrly álemimen: joǵary klassikadan bastap zamanaýi horeografiialyq ónerdiń biregei kartinalaryna deiin tanystyrý.
«Jyl saiynǵy festival keńinen tanymal. Bul festival álem juldyzdarynyń basyn qosady. IV Halyqaralyq Ballet Globe festivali- shyn máninde tarihi oqiǵa. Sonymen qatar, bizdiń ásem teatrymyzdyń sahnasynda bizdiń zamanymyzdyń eń jarqyn álemdik juldyzdarynyń biri Svetlana Zaharovanyń Almatyǵa kelýin balet súier qaýym kóp jyl kútti», - dedi ol.
