Almaty dárigerleri kóptegen ishek fistýlasymen aýrýhanaǵa túsken naýqasty aman alyp qaldy, dep habarlaidy QazAqparat.
Almaty qalalyq qoǵamdyq densaýlyq saqtaý basqarmasynyń málimetinshe, 45 jastaǵy naýqas ileostomiia – otadan keiingi qursaq qýysyndaǵy sańylaý, ishtiń orta bólimindegi ishek fistýlalaryna jasalǵan otadan keiingi tyrtyqtyń saldarynan bolǵan ashyq jaramen Almaty qalalyq jedel shuǵyl kómek kórsetý aýrýhanasynyń (QJShKKA) hirýrgiialyq bólimshesine shuǵyl túrde tústi.
Patsient jara saldarynan táýligine 5 litrge deiin suiyq joǵaltqan, bir aida 30 keli salmaq tastaǵan, aýrýhanaǵa álsiz kúide tústi. Buǵan deiin, patsientke Almaty jáne Almaty oblysynyń aýrýhanalarynda 7 ret ota jasalǵan.
QJShKKA tájiribeli dárigerleri men medbikelerinen quralǵan brigada laparotomiia, adgezioliz, ilmekaralyq abstsesti ashý, ileo-astsendo-anastomozymen ileostomiiany joiýdy iske asyryp, qursaq qýysyna sanatsiia jáne drenajdaý jasady.
«Bólimshege túskende naýqastyń jaǵdaiy óte aýyr boldy: ishken sýy suiyq retinde birden jaradan qaita shyǵyp, oǵan aýyrtpalyq túsirip, ábden qajytqan. Birinshi ota 7 saǵatqa sozylǵandyqtan, bizge de qiyn boldy. Biz mundai otalardy jii bolmasa da, buǵan deiin de jasaǵanbyz. Hirýrgiiada bul eń qiyn otalardyń biri bolyp sanalady. Onyń ústine naýqas óte álsiz boldy», - deidi dáriger Nurhat Esenbekov.
Naýqastyń jaǵdaiy ońalǵan soń, oǵan ekinshi ota jasaldy.
Qazir patsienttiń jaǵdaiy jaqsy, ol úiine shyǵaryldy.
