Qazirgi ýaqytta qala tolyǵymen kúshtik qurylymdarynyń baqylaýynda. Jaǵdai turaqtaldy. Bul týraly Almaty qalalyq politsiia departamentiniń basshysy Qanat Taimerdenov aitty, dep habarlaidy QazAqparat.
Qanat Taimerdenovtyń aitýynsha, shaharda tótenshe jaǵdai rejimi aiaqtalsa da lańkestikke qarsy is-shara áli de jalǵasyp jatyr.
«Qazir biz turǵyndarǵa qarýdy óz erkimen tapsyrý kerektigin aityp jatyrmyz. Tapsyrǵandardy, árine, qandai da bir qylmysqa qatyspasa, jaýapqa tartpaimyz. Jedel is-shara kezinde qarýy tárkilengender, qoldanystaǵy zańnamaǵa sáikes eń aýyr qylmystyq jaýapqa tartylady. Qarý urlaýǵa qatysqandardy izdestirý úshin arnaiy jedel-izdestirý toby qurylyp, jeke quramnyń barlyǵy osyǵan baǵyttaldy. Ministrlik bul máseleni erekshe baqylaýda ustap otyr», – deidi Qanat Taimerdenov.
Sonymen qatar ol politsiia departamentine keibir politsiia qyzmetkerleriniń zańsyz áreketteri men ókilettigin asyra paidalanǵany týraly azamattardan aryz-shaǵymdar túsip jatqanyn atap ótti.
«Olardyń árqaisysy formalizmge jol bermei, muqiiat tekseriledi. Bul ministrdiń jáne bizdiń qyzmetkerlerge qoiatyn talabymyz – zańdylyqty qatań saqtaý. Qazirgi ýaqytta basqasha áreket etýdiń joly joq. Sonymen qatar, adamdar bir ýaqytta elimizde tynyshtyqty joǵaltyp alýymyz múmkin bolǵanyn túsinýi kerek. Muny kóbi túsinedi de. Óitkeni sol kúnderdiń ózinde top-top bolyp jinalyp, talai nysandy tonaýshylardan qorǵai bilgen beibit turǵyndar bar. Iaǵni, azamattyq qoǵam da bul kúnderi úlken qoldaý kórsetti. Adamdar kelip, qyzmetkerlerimizdi tamaqtandyrdy, kóptegen máseleler boiynsha, sonyń ishinde qaza tapqandardyń otbasylaryna kómektesýge daiyn boldy. Rasynda, osy kúnderi biz myqty qoldaýdy sezindik», – deidi Almatynyń bas politseii.
Sóz sońynda Qanat Taimerdenov Almatydaǵy jaǵdai turaqtalyp kele jatqanyn tilge tiek etti.
«Qazirgi ýaqytta qala tolyǵymen kúshtik qurylymdarynyń baqylaýynda. Jaǵdai turaqtalyp keledi», - dedi ol.
