Almatydaǵy ál-Farabi dańǵylynda bolǵan rezonanstyq jol-kólik oqiǵasy boiynsha sot protsesi jalǵasýda, dep habarlaidy ult.kz HALYQSTAN telegram arnasyna silteme jasap.
Qaza tapqandardyń týystary aiyptalýshy Aleksandr Pakty keshiretinderin málimdep, oǵan bas bostandyǵynan aiyrýmen bailanysty emes jaza taǵaiyndaýdy surady. Sondai-aq olar buǵan deiin aitylǵan 100 million teńge kólemindegi ótemaqy talabynan bas tartty.
Mamandandyrylǵan aýdanaralyq qylmystyq sotta ótip jatqan kezekti otyrysqa Aleksandr Pak densaýlyǵyna bailanysty onlain formatta qatysty. Onyń aiaǵyndaǵy aýyrsyný men tasymaldaý kezindegi qiyndyqtarǵa bailanysty sot zalyna jetkizilmegeni belgili boldy. Marqumdardyń týystary da protseske qashyqtan qosyldy.
Sot barysynda qaza bolǵan qyzdardyń biri – Qumardyń anasy Baqytgúl Joldasova qyzynyń qazasy týraly aýyr estelikterimen bólisti.
Onyń aitýynsha, qyzy taksi júrgizip, nesie tólemderin óteýmen ainalysqan. Qaiǵyly oqiǵa bolǵan kúni ol nesie boiynsha 260 myń teńge tóleýi kerek bolǵan. Qajetti somanyń jetispeýine bailanysty qosymsha tabys tabý úshin jumysqa shyqqan.
– Saǵat 23:30 shamasynda qyzymnyń úige kelmegenine alańdap, oǵan beineqońyraý shaldym. Kólikte jolaýshylar otyrǵan edi. Bul bizdiń sońǵy sóilesýimiz boldy. Ol meni ýaiymdamaýǵa shaqyrdy. Alaida kelesi kúni tańerteń onyń qaitys bolǵany týraly habar aldyq, – dedi marqumnyń anasy aýdarmashy arqyly.
Baqytgúl Joldasova sotta Aleksandr Pakqa qatysty eshqandai talaby joq ekenin aitty. Onyń sózinshe, aiyptalýshy kinásin tolyq moiyndap, ókinish bildirgen jáne materialdyq ári moraldyq shyǵyndardy ótegen.
– Biz ony keshirdik. Bolashaqta da eshqandai talap qoimaimyz. Tatýlasý óz erkimizben júzege asty. Sottan oǵan bas bostandyǵynan aiyrýǵa bailanysty emes jaza taǵaiyndaýdy suraimyz, – degen málimdemeni aýdarmashy oqyp berdi.
Marqum Elamannyń týystarynyń múddesin qorǵaýshy advokat Oleg Chernov mundai sheshim qabyldaý jábirlenýshilerdiń zańdy quqyǵy ekenin atap ótti.
Sonymen birge ol aiyptalýshynyń jazadan tolyq qutylyp ketýi ekitalai ekenin jetkizdi.
– Qylmystyq kodekstiń 345-1-babynda mas kúiinde kólik júrgizip, abaisyzda eki nemese odan da kóp adamnyń ólimine sebep bolǵan tulǵalarǵa 7 jyldan 10 jylǵa deiin bas bostandyǵynan aiyrý jazasy qarastyrylǵan. Bul bapta balama jaza kózdelmegen. Erekshe jaǵdailarda ǵana sot ózge sheshim qabyldaýy múmkin, biraq mundai múmkindik óte tómen dep esepteimin, – dedi advokat.
Sot otyrysyna qatysýy tiis taǵy bir jábirlenýshi bul joly bailanysqa shyqpaǵan. Onyń jaýaby 4 maýsym kúni saǵat 10:00-ge josparlanǵan kelesi otyrysta tyńdalady.
