Prezident Is basqarmasy Almatydaǵy Memleket basshysynyń rezidentsiiasy nege súriletinin túsindirdi, - dep habarlaidy Tengrinews.kz.
PIB baspasóz qyzmeti málimetinshe, sarapshylar rezidentsiia ǵimaratynyń "paidalanýǵa jaramdylyǵy shekteýli" degen qorytyndy jasaǵan.
"Órt pen óte joǵary temperatýra saldarynan barlyq júk kótergish qurylym men shatyrdyń negizi sanalatyn metall elementteri zaqymdanǵan. Ǵimarattyń saqtalyp qalǵan bóligindegi órt iisin tolyǵymen joiý múmkin emes.
Onyń ústine búginde nysannyń keibir qurylymdyq elementteri qoldanystaǵy qurylys normalary men erejelerine sáikes kelmeidi. Ǵimarattyń negizgi qurylymdaryn qalpyna keltirý jáne onyń seismikalyq nyǵaitylýyna orasan zor kúrdeli salymdar qajet", - dedi Prezident Is basqarmasy ókilderi.
Sarapshylardyń pikirinshe, rezidentsiiany jóndeý jáne onda belsendi jumys isteý de qaýipti. PIB baspasóz qyzmeti ǵimaratty buzý zańmen belgilengen barlyq rásimdi saqtai otyryp júrgiziletinin habarlady.
