Bul shara Dúniejúzilik sút bezi qaterli isigine qarsy kúres kúni qarsańynda uiymdastyrylyp otyr, dep habarlaidy "Ult aqparat".
Almaty qalalyq densaýlyq saqtaý basqarmasynyń habarlaýynsha, 15 qazan - Dúniejúzilik sút bezi qaterli isigine qarsy kúres kúni.Osyǵan bailanysty 10 –17 qazan kúnderi tańǵy saǵat 09.00-den 15.00-ge deiin «Almaty onkologiialyq ortalyǵynda» qaterli isikti erte anyqtaý maqsatynda ashyq esik kúni ótedi.
Dúniejúzilik densaýlyq saqtaý uiymynyń málimetteri boiynsha qaterli isik aýrýlary álemde ólimniń ekinshi negizgi sebebi. Qazaqstanda jyl saiyn 3 myńnan astam sút bezi qaterli isigi anyqtalady. Ony alǵashqy kezeńderde mammografiia jáne sút beziniń ýltradybystyq zertteýi arqyly anyqtaýǵa bolady. 40 jastan asqan árbir áiel 2 jylda bir ret mammografiiadan ótýi kerek. Jasyna qaramastan, keýdedegi kez kelgen túzilimder anyqtalsa, onkologpen keńesý kerek. Aýrýdyń aldyn alýǵa otbasylyq ómirdiń ýaqtyly bastalǵany áser etedi. Bosaný jáne emizý sút bezi qaterli isiginiń qaýpin azaitady. Erte kezeńde diagnoz qoiý kezinde tolyq emdelý yqtimaldyǵy 100% jetedi.
Profilaktikalyq tekserýdiń ýaqyty men ótkiziletin orny:
1. Klinikalyq-diagnostikalyq bólimshe: Papanin k-si, 220 liter A. 1-qabat
2. Skriningtik bólimshe: Ótepov kóshesi, 7a, 2-qabat.
Ashyq esik kúnine bailanysty barlyq suraqtar boiynsha myna telefondarǵa habarlasýǵa bolady: + 7-707-7617262; + 7-707-4974414; + 7-727-312-24-74.
