Almaty qalasynyń Tótenshe jaǵdailar departamenti órtenip jatqan «Altyn bulaq-2» turǵyn úi kesheninen turǵyndardy evakýatsiialaý sáti túsirilgen video jariialady, dep habarlaidy QazAqparat.
Vedomstvonyń baspasóz qyzmeti órttiń 01:10-da oqshaýlanǵanyn málim etti.
«Tilsiz jaýdy aýyzdyqtaýǵa 70-ten astam qyzmetker men 18 tehnika jumyldyrylǵan. Evakýatsiia júrip jatyr. Sol jerde turǵan jeke kólikterdiń kóp bolýy órt sóndirý tehnikasyna kedergi bolǵanyna qaramastan, órt baspaldaqtary qoiyldy, adamdardy qutqarý jáne evakýatsiialaý úshin AKTP-54 avtomatty teleskoptyq topsaly kótergish paidalanyldy», - dep habarlady vedomstvodan.
Oqiǵa ornynda jedel shtab qurylyp, gaz-tútinnen qorǵaý qyzmetiniń bólimsheleri shyǵys jáne batys jaǵynda ornalastyryldy.
«Qazirgi ýaqytta 120-dan astam adam evakýatsiialandy, 20 adam qutqaryldy, órt sóndirý stvoldary engizildi, gidranttarǵa tsisternalar ornatyldy», - dep qorytyndylady Almaty qalasy Tótenshe jaǵdailar departamentiniń baspasóz qyzmeti.
Esterińizge sala keteiik, 11 jeltoqsanda saǵat 23:58-de Almaty qalasynyń Tótenshe jaǵdailar departamentiniń kúshteri men tehnikasy shuǵyl shaqyrtý boiynsha Almaly aýdany, Brýsilov kóshesi, 167 úidegi órtti sóndirýge attanǵan bolatyn. Olar kelgen sátte, «Altyn bulaq-2» turǵyn úi kesheniniń 6-7 qabatyndaǵy eki blok, sondai-aq 17-18-shi qabat janyp jatqan edi.
