Foto: Ult.kz
Almatynyń taǵy bir tańy erekshe shabytpen atty. Qala kúnimen qatarlasqan KitapFest-2025 Arbatty taǵy da rýhaniiattyń altyn besigine ainaldyrdy. Bul – jai ǵana mereke emes, kitap pen oqyrmannyń, sóz ben oidyń, avtor men qoǵamnyń toǵysqan sáti. Demalys kúnderi Ult.kz tilshisi kitap festivaline qatysyp qaitty.
Arbat boiy biyl erekshe sánge bólendi: 60 baspadan 10 myńnan astam kitap usynyldy, onyń 2 myńy alǵash ret oqyrman qolyna jetti. Ár muqaba – jańa álemge ashylǵan esik, ár bet – jańa oidyń bastaýy.
Foto: Ult.kz
Qalamger men oqyrmannyń júzdesýi
Sahna tórinde belgili avtorlar – Saýle Dosjan, Aqberen Elgezek, Maqsat Málik, Bigeldi Ǵabdýllin, Jádi Shákenuly, Baqyt Bedelhan jáne basqa da qalamgerler oqyrmanymen tikelei júzdesti. Óleń oqyp, áńgime shertip, qoltańba berip, ádebiettiń tiri tynysyn syilady.
Foto: Ult.kz
Aqyn Álibek Shegebai da óziniń qýanyshyn jasyrmady:
«Ár jyl saiyn qala kúni merekesi joǵary deńgeide ótedi. Biylǵy KitapFest-2025 – sonyń dáleli. Arbat alańynda búkil Qazaqstannyń baspalary men kitaphanalary bas qosyp, jańa kitaptaryn usyndy. Osy aiada men de Uly Abaidyń 180 jyldyǵyna orai jaryq kórgen «Qara sóz qara óleńge ainalǵan» atty kitabymnyń tusaýyn kestim», – dedi ol.
Al aqyn Erlan Júnis KitapFest-ti Almatynyń rýhani ómirindegi erekshe qubylys dep baǵalady:
«Kez kelgen qalanyń áleýmettik-ekonomikalyq tirshiliginen bólek mádeni-rýhani tynysy bar. Sol tynysty tolyqtyratyn – kitaphanalar men osyndai festivalder. Ásirese, bul merekeniń Almatynyń týǵan kúnimen tuspa-tus ótýi qala halqyna erekshe rýhani serpin berdi», – dedi ol.
«Jandy kitaphana» men jańa jobalar
Festivaldiń erekshe aimaqtarynyń biri – «Jandy kitaphana». Munda Abaidan Shekspirge deiingi klassikter akterlerdiń beinesinde oqyrmanmen «tildesti». Estelik Zone balalardy ertegiler álemine jetelese, «Kitapashar» býkinistikalyq jobasy qonaqtarǵa kútpegen ádebi sapar syilady.
Foto: Ult.kz
Arbatta býkkrossing aimaqtary, sheberlik sabaqtary, fotozonalar qyzý ótti. Bir jerde balalar balshyqtan músin jasasa, basqa jerde jastar komiks salyp, beinerolik túsirip jatty. TrendZone-daǵy TikTok-fondary men Instagram-aimaqtary jastardyń súiikti mekenine ainaldy.
Kitap – qalanyń júreginde
Festivaldiń alǵashqy kúninde 30 myńnan astam adam qatysyp, 10 myńnan asa kitap satyldy. Biraq bul tek statistika emes – árbir satylǵan kitap óz oqyrmanyn tapqan jańa taǵdyr, jańa áńgime.
Foto: Ult.kz
KitapFest – oiǵa batyratyn, qiialdy qanattandyratyn, urpaqtar arasyn jalǵaityn mereke. Arbattaǵy serýen endi tek qadam emes, kitap betterinde júrgendei áser qaldyrdy. Qazaq ádebietiniń klassikterin somdaǵan ártister halyqpen aralasyp, beine bir kitap keiipkerleri muqabadan shyǵyp ketkendei boldy.
«KitapFest – bul jai ǵana kitap merekesi emes. Bul – urpaqtar arasyndaǵy suhbat ornaityn, ádebiet qala ómirimen qaita toǵysatyn keńistik», – dedi Qazaqstannyń eńbek sińirgen qairatkeri, jazýshy Saýle Dosjan.
Almatynyń júreginde ótken KitapFest-2025 ádebietsúier qaýymdy toǵystyryp, qalaǵa rýhani tynys qosty. Arbat taǵy da jyr men oidyń, kitap pen qiialdyń mekenine ainaldy.
Aqbota Musabekqyzy
