Foto: Almaty ákimdigi
Almaty qalasynyń ákimdigi Gogol kóshesi men Dostyq dańǵylynyń qiylysynda ornalasqan, 1908 jyly salynǵan eki qabatty burynǵy «Jetisý» qonaqúii ǵimaratynyń buzylýyna qatysty túsinikteme berdi, dep habarlaidy Ult.kz.
Qalalyq memlekettik aktivter basqarmasynyń málimetinshe, atalǵan nysan tarih jáne mádeniet eskertkishteri tizimine enbegen jáne tarihi-mádeni mura obektisi mártebesine ie bolmaǵan.
Ár jyldary bul ǵimaratta qalalyq qyzmetter men politsiia pýnkti ornalasqan. 2022 jyldan bastap nysan tehnikalyq jaǵdaiynyń qanaǵattanarlyqsyz bolýyna bailanysty is júzinde paidalanylmaǵan. 2025 jyly júrgizilgen tehnikalyq tekserý qorytyndysyna sáikes, ǵimarat apatty dep tanylyp, ony qalpyna keltirý múmkin emestigi anyqtalǵan. Osyǵan bailanysty nysandy buzý týraly sheshim qabyldanǵan.
Qazirgi ýaqytta jer ýchaskesi memlekettik jer qoryna berilgen.
Aita keteiik, «Jetisý» qonaqúiinde 1920 jyldardyń sońynda Lev Trotskii otbasymen turǵan. Sondai-aq munda kompozitorlar Evgenii Brýsilovskii men Sergei Prokofev jáne ózge de belgili tulǵalar aialdaǵan.
