- Memleket basshysy Nursultan Nazarbaevtyń atynan Almatyda qyzmet barysynda qaza tapqan tártip saqshylarynyń týystaryna jáne qalalyq IID birqatar politseilerine orden men medaldar tabys etildi, dep habarlaidy Ult.kz tilshisi QazAqparat agenttigine silteme jasap.
QR Táýelsizdiginiń 25 jyldyǵyna arnalǵan saltanatty sharada QR IIM orynbasary politsiia general-maiory Berik Bisenqulov qyzmet babynda qaza tapqan politseilerdiń týystaryna nagradalardy tapsyrdy.
«Táýelsizdik jyldary qyzmet babyn orynbaý barysynda 837 ishki ister organy qyzmetkeri mert boldy, 3 myńnan astamy jaralandy. Kórsetken erligi úshin 1100 politsei memlekettik nagradaǵa ie boldy, ókinishtisi, onyń 115-ine qaza tapqannan keiin marapattary tabys etildi. Politsiia kapitany Ǵaziz Baitasov pen polkovnik Qairat Úmbetov joǵary «Halyq Qaharmany» ataǵyna ie boldy», - dedi B.Bisenqulov óz sózinde.
Ishki ister vitse-ministri óz baiandamasynda Aqtóbe men Almatydaǵy qaiǵyly oqiǵada qaza tapqan jazyqsyz jandarǵa búkil Qazaqstan kóńil aitqanyn, Memleket basshysy Ishki ister organdarynyń erlik kórsetken qyzmetkerlerin arnaiy marapattaǵanyn jetkizdi.
Naqtyraq aitqanda, Elbasy Jarlyǵymen II dárejeli «Aibyn» ordenimen 5 qyzmetker, onyń 4-eýi qyzmet babynda mert bolǵan, III dárejeli «Aibyn» ordenimen 10 qyzmetker, onyń 6-ýy qyzmet babynda qaza tapqan, «Erligi úshin» medalimen 9 qyzmetker jáne Ulttyq ulannyń 2 áskeri qyzmetshisi «Jaýyngerlik erligi úshin» medalimen marapattaldy.
Óz sózinde baiandamashy qaza tapqandardyń otbasylaryna ótemaqy jáne járdem berilgenin habarlady.
.jpeg)