Almatynyń Ekonomikalyq soty buǵan deiin jekeshelendirilgen Barys IV ("optovka" degen atpen tanymal) bazaryn memleket menshigine qaitarýdy talap etken qalalyq prokýratýra shaǵymyn qanaǵattandyrdy, - dep habarlaidy "Ult aqparat".
Is materialdarynan 2013 jyldyń jeltoqsanynda "Naiza-BN" kompaniiasy Barys IV bazaryn memleketten satyp alyp, Almaty qalasy Memlekettik múlik jáne jekeshelendirý departamentimen kelisimshart jasalǵany belgili boldy. Buǵan deiin Bas prokýratýra bul nysannyń bes ese arzan baǵaǵa satylǵanyn habarlaǵan bolatyn. Naryqtaǵy quny 1,5 milliard teńge bolsa, 307 million teńgege satylǵan. Osyǵan bailanysty Almaty prokýratýrasy kelisimshartty jaramsyz dep taný týraly talap-aryzben sotqa júgingen.
"Memlekettik organ zańdy tulǵanyń jarǵylyq kapitalyndaǵy memleket úlesin jekeshelendirý kezinde zańsyz jeńildikter men artyqshylyqtar berýi prokýrordyń talap qoiýyna negiz bolyp otyr. Sot talqylaýy barysynda talap aryzda keltirilgen dálelder rastaldy.
Mámileni jaramsyz dep taný úshin satyp alýshyǵa nysan qunyn tómen baǵalaýda kórsetilgen zańsyz jeńildikter men artyqshylyqtar berý negiz boldy. Sotta memlekettik múlikti arzandatylǵan baǵamen satý deregi rastaldy", - dedi qalalyq sottyń baspasóz qyzmeti ókilderi.
Sot talap aryzdy qanaǵattandyryp, satyp alý-satý shartyn jaramsyz dep taný týraly sheshim qabyldaǵany atap ótilgen.
"Almaty prokýratýrasynyń talap aryzy qanaǵattandyrylyp, satyp alý-satý sharty jaramsyz dep tanylsyn. Sot sheshimine sońǵy sheshim shyǵarylǵan kúnnen bastap bir ai ishinde apelliatsiialyq jáne prokýrorlyq ótinishhat berýge bolady", - dedi sýdia Janar Esembaeva.
Sot sheshimi zańdy kúshine engen joq.
