Almatydaǵy «Jas Otaý» neke saraiy senimgerlik basqarýdan shyǵarylyp, qaitadan qala ákimdiginiń balansyna qaitarylady, dep habarlaidy ult.kz.
24.kz telearnasynyń habarlaýynsha, tarihi ǵimarat 2024 jyly jeke kompaniianyń senimgerlik basqarýyna berilgen. Alaida osy ýaqytqa deiin nysanda jóndeý-qalpyna keltirý jumystary bastalmaǵan.
Kelisimshart talaptaryna sáikes, basqarýshy kompaniia jergilikti mańyzy bar sáýlet eskertkishin jańǵyrtýǵa 1 milliard teńgeden astam investitsiia salýǵa mindettengen. Biraq búginde burynǵy AHAJ ǵimaratynyń ishinde qurylys materialdary men qoqys úiilip jatyr.
Osyǵan bailanysty Almaty qalasynyń Memlekettik aktivter basqarmasy senimgerlik basqarý shartyn buzý rásimin bastady. Vedomstvonyń málimetinshe, nysan qaitadan kommýnaldyq menshikke ótip, ony jańǵyrtý jumystary jergilikti biýdjet qarajaty esebinen júzege asyrylady.
«Kelisimshartta kózdelgen mindettemeler belgilengen merzimde oryndalmaǵandyqtan, senimgerlik basqarý shartyn buzý rásimi júrgizilýde. Keiin nysan Almaty qalasynyń kommýnaldyq menshiginde qalady jáne ákimdik zańnamada belgilengen tártippen jobalaý jáne qurylys jumystaryna kirisedi», – dedi Almaty qalasy Memlekettik aktivter basqarmasy bóliminiń bas mamany Maqpal Ishenova.
Ázirge qaita jańǵyrtý jumystarynyń naqty qashan bastalatyny belgisiz.
