Almatyda aǵashtardyń jappai kesilý oqiǵasyna qatysty politsiia qyzmetkerleri de jaýapqa tartylýy múmkin. Bul týraly Almaty qalasy prokýrorynyń birinshi orynbasary Berik Adamov onlain brifing barysynda málim etti, dep habarlaidy "Ult aqparat".
Onyń aitýynsha, zańsyz aǵash kesý oryn alǵan jerdi kúzetip júrgen politsiia qyzmetkerleriniń áreketteriniń zańǵa sáikestigi tekseriledi.
«Biz qala turǵyndarynyń áleýmettik jelilerdegi shaǵymyn zerdelep, tekseris júrgizýdemiz. Ony Almaly aýdanynyń prokýratýrasy júrgizip jatyr. Politsiia qyzmetkerleriniń is-áreketine zańdy baǵa beriledi. Tekserý nátijeleri boiynsha politsiia bólimine buiryq jiberiledi», — dedi Berik Adamov.
Buǵan deiin, Almatyda Tóle bi kóshesindegi saýda úiiniń aldyndaǵy sirek kezdesetin aǵashtardy kesip tastaǵan kúdikti anyqtalǵany týraly jazǵan bolatynbyz.
Eske sala ketsek, 23 qarashaǵa qaraǵan túni Almatyda saýda úiiniń janynda (Áýezov-Tóle bi kósheleriniń qiylysy) jaiqalǵan emen men qaraǵash otaldy. Buǵan qatysty turǵyndar áleýmettik jelide narazylyq bildirdi.
Keiin Almaty qalalyq Jasyl ekonomika basqarmasy saýda úiiniń aldyndaǵy aǵashtardyń jappai kesilýiniń mán-jaiyn anyqtady.
Bul jaǵdaiǵa Prezident Qasym-Jomart Toqaev nazar aýdaryp, Almaty ákimi Baqytjan Saǵyntaevqa qyzmettik tekserý júrgizýdi, kinálilerdi jaýapkershilikke tartýdy tapsyrdy.
24 qarasha kúni B.Saǵyntaev máseleni óz baqylaýyna alǵanyn málim etti.
