Almatyda jylýmen jabdyqtaý tarifi tómendetildi, dep habarlaidy "Ult aqparat" Tabiǵi monopoliialardy retteý komitetiniń baspasóz qyzmetine silteme jasap.
2020 jylǵy kórsetilgen qyzmet kóleminiń ósýine bailanysty, komitettiń Almaty qalasy boiynsha departamenti halyq úshin jylýmen jabdyqtaý tarifin 3%-ǵa tómendetti. Tómendetilgen tarif 2021 jylǵy 1 aqpannan bastap qoldanysqa engiziledi.
«Tariftiń tómendeý esebinen halyqtyń únemdeitin qarjysy 552 mln teńge. Joǵaryda kórsetilgen kórsetkishterge qol jetkizý úshin, Almaty qalasy ákimdiginiń qoldaýymen halyqtan biýdjettik uiymdarǵa júktemeni qaita bólý faktisi qosymsha yqpal etti», delingen habarlamada.
Buryn habarlaǵanymyzdai, 2021 jylǵy 1 qańtardan bastap jylýmen jabdyqtaýǵa arnalǵan tariftiń josparly 14% - ǵa ósýi kútilgen edi.
Alaida, Almaty qalasy boiynsha departament energiia kózderinde tarifti tómendetý arqyly halyq úshin tariftiń ósýine jol bermeý boiynsha jumys júrgizdi, nátijesinde 2021 jyly halyq úshin tarifti 2020 jylǵy deńgeide ósimsiz qaldyrýǵa múmkindik týdy.
