Elimizde «Amanat» qoǵamdyq komissiiasy quryldy. Búgin Almatyda komissiia músheleri onyń maqsaty men jumysy jaily áńgimelep berdi, dep habarlaidy QazAqparat.
«Amanat» qoǵamdyq komissiiasynyń jáne Ulttyq keńestiń múshesi Ýais Ersaiynulynyń aitýynsha, komissiianyń maqsaty - qańtar oqiǵalarynan keiin qamaýǵa alynǵan kinásiz azamattardyń bostandyqqa shyǵýyna kómektesý.
«Almatyda qańtar oqiǵalarynan keiin kóptegen jazyqsyz adamdar ustalyp, qamalyp jatyr. Bul jait qazaqstandyqtardyń janyna qatty batty. Sondyqtan biz óz bastamamyzben «Amanat» qoǵamdyq komissiiasyn qurdyq. Biz halyqtyń úlken amanatyn arqalap otyrmyz», - dedi Ýais Ersaiynuly.
Qoǵamdyq komissiianyń tóraǵasy Abzal Quspannyń aitýynsha, kópshilik QR Qylmystyq kodeksiniń 272-baby boiynsha isti bolǵandardy bosatýdy surap otyr.
«Men Qylmystyq kodekstiń 272-baby 3 bólimnen turatynyn túsindirgim keledi. 272-baptyń 1-bóliminde - uiymdastyrýshylarǵa, 2-bóliminde - qatysýshylarǵa, 3- bóliminde - arańdatýshylarǵa jaza kózdelgen. Biz 272-baptyń 2-bólimine basa kóńil bólip otyrmyz, sebebi, kóp jaǵdaida belgisiz uiymdastyrýshylar men arandatýshylardyń sózine erip, abaisyzda arandap qalǵan azamattar «qatysýshylar» bolyp sanalady», - dedi Abzal Quspan.
Sondai-aq, onyń aitýynsha, komissiianyń aralasýymen Almatyda bir apta ishinde 36 adam bostandyqqa shyqty
«Shyǵarylǵan 36 adamnyń teń jartysy - jaralylar. 36 adamnyń ishinde 2 kámeletke tolmaǵan bala bar. Bizdiń tizimde bostandyqqa shyǵýy tiis taǵy 3 bala tur. Jalpy, biz jaralylar túgel bosatylýy kerek degen usynys aityp jatyrmyz», - dedi ol.
Komissiia múshesi, advokat Mádi Myrzaǵaraevtyń aitýynsha, qamaýda otyrǵan áielder, 18-ge tolmaǵan balalar, jaraqat alǵandar, tonaý men urlyqqa qatyspaǵan, beibit sherýge shyqqanazamattardyń qoǵamǵa eshqandai qaýpi joq.
«Olar qylmyskerler emes, sebebi, olar qalany tonaýǵa qatysqan joq. Demek, olardy qoǵamǵa qaýipsiz dep sanap, tergeý aiaqtalǵanǵa deiin bas bultartpaý sharasyn ózgertip, qamaýdan eshqaida ketpeý týraly qolhatqa aýystyrý qajet dep sanaimyz. Biz quqyq qorǵaý, prokýratýra organdarynyń aldynda osy máseleni qoiyp otyrmyz. Sebebi, jazyqsyz jandardyń bir kún bolsa da abaqtyda artyq otyrýy olar úshin azap»,- dedi advokat Mádi Myrzaǵaraev.
Sondai-aq, ol «Amanat» komissiiasynyń atyn jamylyp, tergeý izoliatorynyń janynda belgisiz bir top adamnyń júrgenin aitty.
«Olar qamaýda otyrǵan azamattardyń ata-analary men týystaryna «biz Amanat komissiiasynanbyz, múshelerimiz» deitin kórinedi. Olar muny qandai piǵylmen, ne maqsatpen aityp jatqany bizge belgisiz. Sol úshin azamattardy saqtandyrǵymyz keledi. Sebebi, qazirgi sátti paidalanyp, óziniń bas paidasyn oilaityn adamdar tabylýy múmkin. Men «Amanat» komissiiasynyń jumysy tegin, aqysyz, bizge eshqandai marapat, syiaqy kerek emes ekenin eske salǵym keledi. Eger bireý «Amanat» komissiiasynyń múshesimin, sizge kómektesem, jaqynyńyzdy, týysyńyzdy shyǵaryp berem» dep ol úshin aqsha, syilyq surap, dámetetin bolsa, olarǵa aldanyp qalmańyzdar», - dedi ol.
Abzal Quspannyń aitýynsha, komissiia aldaǵy ýaqytta el óńirlerin aralaýǵa shyǵady.
«Semei qalasyna Almaty qalasynyń turǵyny, belgili zańger Erlan Qaliev búgin jetti. Ol prokýratýra organdarymen birlese komissiia atynan sonda jumys jasaidy. Basqa óńirlerge ózimiz baryp, barlyq jaǵdaimen tanysyp, jumys júrgizetin bolamyz. Biz 200 adammen jeke kezdesip jáne olardyń is materialdaryn qarastyrýdamyz. Biraq áli qarap úlgermegen materialdar da bar. Óńirlerdi aralap bolǵan soń, Almatyǵa qaita oralamyz. Biz tek qylmystyq istermen ǵana ainalysýdamyz», - dep qorytyndylady ol.
