Ishki ister ministrligi el aýmaǵynda «Stop-trafik» jedel aldyn alý sharasyn ótkizdi, dep habarlaidy "Ult aqparat".
«Bul sharanyń maqsaty – adam saýdasyna, jeńgetailyqqa, adamdy májbúrli eńbekke tartýǵa qatysty qylmystardyń betin ashý. Aktsiia barysynda adam saýdasynyń túrleri, májbúrli eńbek pen seksýaldy quldyqqa qarsy kúres sharalaryna qatysty aqparattandyrý jumysyna basa mán berildi. Úsh kúnniń ishinde bul baǵytta 65 qylmys tirkeldi. Atap aitqanda adam saýdasyna qatysty 6, májbúrli eńbekke tartýǵa qatysty 1 qylmys anyqtaldy», - dedi baspasóz máslihatynda IIM baspasóz qyzmetiniń qyzmetkeri Kámil Ǵaliev.
Sonymen qatar aktsiia barysynda politsiia qyzmetkerleri jezókshelerdiń 48 pritonyn anyqtaǵan. Jezókshelikke tartýdyń 10 jaǵdaiy (olardyń bireýi kámeletke tolmaǵan) tirkelgen.
Politsiia ókili naqty mysaldy keltirdi.
«Almatyda eki boijetkendi aldap, qorqytyp jezókshelikke tartty degen kúdikpen 26 jastaǵy áiel ustaldy. Onyń Qyzylorda oblysynyń týmasy ekeni belgili bolyp otyr. Zardap shekkenderdiń biri kámeletke de tolmaǵan. Politsiia bul faktini áleýmettik jelilerdi taldap otyrǵan kezde anyqtady. Álgi boijetken intimdi qyzmet kórsetetini týraly habarlama berip otyryp ustalǵan», - deidi ol.
Kúdikti QR Qylmystyq kodeksiniń 134-baby (kámeletke tolmaǵan adamdy jezókshelikpen ainalysýǵa tartý) jáne 308-baby (jezókshelikpen ainalysýǵa tartý) boiynsha jaýapqa tartylǵan. Zardap shekkenderge kómek kórsetilýde.
