Foto: ashyq derekkóz
Jańa jyldyq mereke kúnderi Almaty qalasynyń jedel meditsinalyq járdem qyzmeti shtattyq rejimde jumys istep, turǵyndarǵa úzdiksiz kómek kórsetti, dep habarlaidy Ult.kz inAlmaty.kz saityna silteme jasap.
Almaty qalalyq óńirlik kommýnikatsiialar qyzmetinde ótken brifingte jedel meditsinalyq járdem qyzmeti direktorynyń orynbasary Andrei Lojkinniń aitýynsha, 2025 jylǵy 31 jeltoqsan men 2026 jylǵy 4 qańtar aralyǵynda qyzmetke 11 158 shaqyrtý túsken. Onyń ishinde 10 059 jedel shyǵý oryndalǵan.
Mereke kúnderi táýlik boiy 189 jedel járdem brigadasy kezekshilik atqaryp, olardyń quramynda 500-den astam meditsina qyzmetkeri – dárigerler, feldsherler, júrgizýshiler jáne kishi meditsinalyq personal jumys istegen.
Eń az qońyraý dástúrli túrde jańa jyl túni tirkelgen. Bul ýaqytta shamamen 1 900 shaqyrtý túsken, bul ortasha táýliktik kórsetkishten 600-ge jýyq az.
Statistikaǵa sáikes, almatylyqtar jedel járdemdi kóbine tynys alý júiesi aýrýlaryna (22,53%), júrek-qan tamyrlary syrqattaryna (17,28%), sondai-aq jaraqattar men ýlanýlarǵa (14,5%) bailanysty shaqyrǵan. Mamandar bul úrdis jyl saiyn qaitalanatynyn atap ótti.
Merekelik kezeńde pirotehnikany qoldanýǵa bailanysty 20 jaraqat deregi tirkelgen, onyń 11-i balalarǵa qatysty. Eń jas zardap shekken bala – tórt jasta. On adam jedel járdem brigadalary arqyly aýrýhanaǵa jetkizilse, jeti adam ózdiginen meditsinalyq kómekke júgingen, al úsh adam jeńil jaraqatqa bailanysty aýrýhanaǵa jatýdan bas tartqan.
Sonymen qatar mereke kúnderi meditsina qyzmetkerleri bes ret sátti reanimatsiialyq kómek kórsetken. Sondai-aq jedel járdem brigadalary úsh ret úi jaǵdaiynda bosandyryp, bir ul men eki qyz dúniege kelgen.
Jedel meditsinalyq járdem qyzmetinde mereke nemese jumys kúnine qaramastan, árbir naýqasqa ýaqtyly ári sapaly kómek kórsetý basty basymdyq bolyp qala beretinin atap ótti.
