Almatyda jańa týǵan nárestesin satpaq bolǵan 22 jastaǵy kelinshek ustaldy, dep habarlaidy "Ult aqparat" tilshisi qalalyq IID baspasóz qyzmetine silteme jasai otyryp.
Vedomstvonyń málimetine súiensek, Qyzylorda oblysynyń 22 jastaǵy týmasyn politseiler onyń júktiliginiń sońǵy kezderinde baqylaýyna alǵan.
1994 jylǵy qyz kúieýimen jáne taǵy 2 jáne 3 jasar balalarymen jaldamaly páterde turǵan. Basylymnyń málimetinshe, ol úshinshi sábiin dúniege ákelgisi kelmegen. Biraq júktiligin bilgen sátte ol sábiinen paida kórmek bolǵan. Osylaisha, kúieýinen ruqsat alǵan áiel balasyn satatynyn aitqan. Sondai-aq, basylymnyń málimetinshe, áiel jezókshelikpen ainalysqan. Soǵan bailanysty Túrksib aýdandyq IIB-de birneshe ret bolǵan. Osylaisha, oǵan bir adam sábidi "satyp alýshy" retinde jiberiledi. Sodan ol sábidi 2000 dollarǵa alyp ketýge bolatynyn aityp, olar ózara kelisedi.
«Jedel joldarmen jetken aqparatty tekserip, onyń rastyǵyna kóz jetkizdik. Naqtyraq aitqanda, eki balanyń anasy qursaqtaǵy úshinshi sábiin 2000 AQSh dollaryna satpaq bolǵan. Aqshanyń bir bóligin ol júktiliginiń sońǵy kezeńinde alǵan. Qalǵan bóligin balasyn bolashaq ata-anasyna tapsyrý kezinde almaq bolǵan. Ol salmaǵy 4 keli bolǵan er balany aman-esen dúniege ákeldi. Qylmystyq jolmen jasalǵan kelisim Almaty qalasy Seifýllin kóshesiniń birindegi úide jasaldy. Kúdikti aqshany alý kezinde qolǵa tústi», - deidi Almaty qalasy IID Uiymdasqan qylmystyq toppen kúres basqarmasynyń basshysy, politsiia polkovnigi Erlan Oralbekov.
«Atalǵan fakt QR QK 135 baby 1 bóligi boiynsha sotqa deiingi tergep-tekserý biryńǵai tizilimine tirkeldi. Isti IID Tergeý basqarmasy júrgizip jatyr. Sábi Balalar úiine berildi», delingen habarlamada.
