Almatyda jańa tórt jolaqty jol ashyldy. Bul týraly Baqytjan Saǵyntaev óziniń Instagram-daǵy paraqshasynda jazdy, dep habarlaidy "Ult aqparat".
«Joldy jaqsartý boiynsha aýqymdy jumys jalǵasýda – jańa jol salyp, bar joldy jóndep, uzartýdamyz. Jaqynda Alataý kóshesiniń Sábdenov kóshesinen Raiymbek dańǵylyna deiingi 2 shaqyrymdyq ýchaskesi ashyldy. Tórt jolaqty jol Naýryzbai aýdanynyń ákimshilik ortalyǵyn qalanyń iri magistralimen bailanystyrdy. Abai dańǵylyn uzartý jumystary aiaqtalǵan soń qala ortalyǵymen kólik qatynasy edáýir jaqsarady», - dep jazdy Almaty ákimi.
«Jańa Almatyny» damytýdyń keshendi jospary aiasynda Alataý, Túrksib pen Naýryzbai aýdandaryna qarasty segiz yqshamaýdandaǵy 415 kóshede 108 shaqyrym jol salynyp jatyr. Sondai-aq, biyl Medeý aýdanyndaǵy «Dýman» yqshamaýdannyń 59 kóshesinde, iaǵni 30,5 shaqyrym joldyń kúrdeli jóndeý jumysy aiaqtalady.
«Uzyndyǵy 206 shaqyrymnan asatyn 212 kóshede ortasha jóndeý jumysy júrgizilýde. Sonyń 20-sy magistraldy, uzyndyǵy 43 shaqyrym. Ol Rysqulov, Súiinbai, Seifýllin, Raiymbek dańǵyly, sondai-aq Sátbaev, Kýderin, Jansúgirov, Iassaýi, Shaliapin, Momyshuly, Jandosov, Qurmanǵazy kóshesi. Jóndeý jumysynyń jalpy kóleminiń shamamen 20%-yn aiaqtaý qaldy»,- dep atap ótti Baqytjan Saǵyntaev.
Jalpy, 237 shaqyrym jolda ortasha jáne kúrdeli jóndeý júrgiziledi. 71 shaqyrym injenerlik jeliler salynǵannan keiin qalpyna keltiriledi. Al 70 shaqyrym jol birinshi ret salynady.
«Jol qozǵalysyn basqarý protsesterin avtomattandyrý jalǵasýda. Búgingi kúni QBAJ (qozǵalysty basqarýdyń avtomattandyrylǵan júiesi) modernizatsiiasynyń birinshi kezeńi aiaqtaldy, onda 93 baǵdarsham obektisi júiege qosylǵan. Basqarý ortalyq basqarý ortalyǵynyń úi-jaiynan júzege asyrylady. Qazirgi ýaqytta paidalanýǵa berý jumystary júrgizilýde. Ekinshi kezeń, 357 baǵdarshamdy QABJ-ǵa qosýdy kózdeidi, ol 2022 jylǵa josparlanǵan»,- dep jazdy ákim.
