QR Qarjy ministrligi Qarjy monitoringi komitetiniń Almaty qalasy boiynsha Ekonomikalyq tergeý departamenti qyzmetkerleri qala aýmaǵynda jalpy somasy 3 mln. astam teńgeni quraityn 500 jáne 5000 teńge nominaldarynda jalǵan aqsha daiyndaý jáne ótkizýmen ainalysqan úsh adamnan turatyn qylmystyq topqa qatysty sotqa deiingi tergeýdi aiaqtady.
Bul týraly Qarjy ministrliginiń baspasóz qyzmeti habarlady.
Baspasóz qyzmetiniń málimetterine qaraǵanda, tekseris barysynda buryn sottalǵan bir top azamattyń aldyn-ala kelisim boiynsha QR Ulttyq bankiniń jalǵan banknotalaryn daiyndap, ótkizý maqsatynda jasyryn tseh uiymdastyrǵany anyqtaldy.
Sonymen, qylmystyq toptyń turǵylyqty jerindegi jalǵan aqsha jasaityn tsehqa beiimdelgen páterdi tintý kezinde úsh noýtbýk, túrli-tústi printerler, eritkishter, ýltrafiolet jaryqtandyrǵysh sham, laminator, 500 jáne 5000 teńge nominalyndaǵy sý tańbasynyń izderi bar klisheler, sý tańbasyn yǵystyrýǵa arnalǵan tyǵyzdaǵysh, boiaý quiylǵan bótelkeler, flesh-jad quraldary tárkilenip alyndy.
Jedel-izdestirý is-sharalarynyń nátijeleri boiynsha tárkilengen jalǵan banknottardyń jalpy somasy 308 000 teńgeni quraityn 85 dana boldy.
Qylmystyq top músheleri ustalar aldynda vanna bólmesinde jalǵan aqsha túrindegi zattai dáleldemelerdi órtep úlgergen.
«Úsh aiyptalýshy da QR QK 231 baby, 2-b., 1-t. (adamdar tobynyń aldyn ala sóz bailasýymen jalǵan aqsha nemese baǵaly qaǵazdar jasaý, saqtaý, alyp ótý nemese ótkizý) sáikes kináli dep tanylyp, olarǵa 6 jyldan 9 jylǵa deiin ártúrli merzimge bas bostandyǵynan aiyrý jazasy taǵaiyndaldy»,-delingen QR QM QMK baspasóz qyzmetiniń málimetterinde.
