Almatyda QR Prezidenti Nursultan Nazarbaevtyń «Bolashaqqa baǵdar: rýhani jańǵyrý» atty maqalasynda aitylǵan mindetterdiń biri - «Jahandaǵy zamanaýi qazaqstandyq mádeniet» jobasy boiynsha qurylǵan jumys tobynyń alǵashqy otyrysy ótti, dep habarlaidy Ult.kz tilshisi QazAqparat agenttigine silteme jasap.
Jiynda QR Prezidenti ákimshiligi Ishki saiasat bóliminiń meńgerýshisi Aida Balaeva atalǵan joba álemniń mańdaialdy týyndylary qataryna Táýelsizdik jyldary jaryqqa shyqqan Qazaqstannyń mádeni qundylyqtaryn qosýǵa, sondai-aq, bolashaqta onyń álemdik mádeniettiń bir bólshegine ainalýyna jol ashatynyn aitty.
Iriktelip alynǵan týyndylar elimizde ómir súrip jatqan barlyq mádenietter men ulttardyń ultaralyq palitrasyn qamtýy kerek.
Osy sala boiynsha qurylǵan jumys toby mádeni týyndylardy irikteý boiynsha uiymdastyrý jumystaryn júieleýdi bastamaq. Jumys tobynyń múshesi ǵalym Erlan Saiyrov «bul joba halyq arasynda áleýmettik optimizmdi týdyrady» degen pikir aitty.
«Jahandyq zamanaýi qazaqstandyq mádeniet» atty jobanyń birinshi otyrysy ótti. Bul jerdegi negizgi maqsat - barlyq shyǵarmashylyq ortalyq ókilderiniń basyn qosyp, Elbasy mindetin júzege asyrý. Ol mindet - kelesi jyldan bastap, Birikken Ulttar Uiymynyń alty tilinde qazaq tili, ádebieti, mádenieti, óner, teatr, kino salasy boiynsha úzdik týyndylardy halyqaralyq deńgeige shyǵarý. Bul joba halyqtyń arasynda áleýmettik optimizmdi týdyrady. Sonymen qatar, bolashaqta Qazaqstannyń strategiialyq resýstaryn jasaidy dep oilaimyn. Óner salasynda jumys toby quryldy, sol jumys toby aiasynda sarapshylar qurylady. Sarapshylar toby short-paraq arqyly jumys isteidi. Naqtyraq aitqanda, Qazaqstandaǵy ónerdiń 4 baǵyty boiynsha, eń úzdik týyndardy jinaidy. Sosyn, osy jyldyń ekinshi jartysynda búkilhalyqtyq talqylaýǵa usynylady. Talqylaýdan iriktelingen shyǵarmalar memlekettik komissiiaǵa jiberiledi», - dedi jumys tobynyń múshesi, saiasattanýshy Erlan Saiyrov.
KSRO jáne Qazaqstan Jazýshylar odaǵynyń múshesi Liýbov Shashkova atalǵan jobanyń basty maqsatynyń biri qazirgi Qazaqstannyń avtorlary men shyǵarmalaryn tanymal etý ekenin aitty.
«Álemde basylyp jatqan, teatr sahnalarynda qoiylyp jatqan, mýzykalyq alańdarda oryndalyp jatqan korifeilerimizdi tanimyz, klassikamyzdy, uly folklorymyzdy bilemiz, al Qazaqstanda táýelsizdik jyldary qandai týyndylar jaryqqa shyqty, jastar ne jazdy, mine, osyny tanytý - mindet», - dedi ol.
Jiynda zamanaýi mádeniettiń úzdik úlgileriniń tizbesin jasaý úshin jumys tobyna qajet irikteýdiń naqty kriteriileri aityldy. Naqtyraq aitqanda, birinshiden, týyndy Qazaqstannyń táýelsizdigi kezeńinde dúniege kelgen bolýy shart, ekinshi, qoǵamda halyq moiyndaǵan, tanylǵan avtorlar bolýy kerek. Úshinshi, jaryq kórgen týyndy (kitap, filmografiia, teatr qoiylymy, kórmelerge qatysý t.b.) qoǵamda tanymal bolýy tiis. Tórtinshi, týyndy jańashyldyǵymen, biregeiligimen, ziiatkerligimen, obrazdylyǵymen, ulttyq bolmysymen erekshelenýi tiis. Besinshi, týyndy joǵary kásibi deńgeige, mádeni, ádebi talǵamǵa, sahnalyq mádenietke sai bolýy qajet.
Altynshy, týyndy zorlyq-zombylyqty, dini arazdyqty, nashaqorlyqty nasihattamaýy tiis. Jetinshi, irikteý kezinde Qazaqstan aýmaǵynda turatyn barlyq mádeniet ókilderi, ulttyq palitra eskerilýi qajet. Aita keteiik, týyndylardy irikteý 3 kezeń boiynsha júzege asyrylmaq. Týyndylarǵa tiisti saraptama men irikteý júrgizilgen soń, jumystardyń tizimi jumys tobynyń jalpy otyrysynda talqylanyp, Ulttyq komissiianyń qaraýyna, bekitýine jiberiledi.
