Foto: Almaty ákimdigi
Qazaqstan halqynyń birligi kúni Almaty qalasynyń Jetisý aýdanynda erekshe shara ótti. Ainabulaq shaǵyn aýdanyndaǵy №4 mamandandyrylǵan balalar-jasóspirimder sport mektebinde el tarihyndaǵy eń uzyn laǵman – 1704 metr ázirlenip, bul kórsetkish resmi túrde Qazaqstan rekordtar kitabyna tirkeldi, dep habarlaidy Ult.kz.
Bul jetistik jai ǵana aspazdyq shara emes, kópultty qoǵamdaǵy birlik pen tatýlyqtyń naǵyz simvolyna ainaldy. Daiyndaý úshin 19 keli un qoldanylyp, 50-den astam qatysýshy – aspazdar men aýdan turǵyndarynyń birlesken eńbegimen taǵam nebári eki saǵatta daiyndaldy. Ártúrli ult ókilderi bir dastarqannyń basynda birigip, qazaqstandyqtardyń birligin pash etti.
Foto: Almaty ákimdigi
Qazaqstan rekordtar kitabynyń resmi ókili Baqytjan Sabituly:
«Laǵmannyń uzyndyǵy qansha metr bolǵanyna qaramastan, rekord ornatyldy. Óitkeni elimizde mundai shara alǵash ret ótip otyr. Biz tek qamyrdyń uzyndyǵyn ǵana emes, sonymen qatar ultaralyq bailanystardyń beriktigin de tirkedik», – dep atap ótti.
Bul kúni bir dastarqan basynda qazaqtar, uiǵyrlar, ózbekter, dúngender, koreiler jáne basqa da ult ókilderi bas qosty. Biri qamyr ilese, biri ony jaidy. Bul qatysýshylar úshin úlken merekege ainalyp, árkim ózin úlken tatý otbasynyń múshesi sezindi.
Jetisý aýdany Analar keńesiniń tóraiymy Rahima Omarova:
«Qatysýshylarǵa qamyrdy úzbei daiyndaý ońai bolǵan joq. Biraq bizdiń aspazdar bul tapsyrmany keremet oryndap shyqty», – dedi.
Aspazdyq sharaǵa qatysýshylardyń biri Zýhra Izmasova áserimen bólisti:
«Laǵmannyń uzyndyǵy tym uzyn bolǵandyqtan, jumys birshama qiyn boldy. Biraq kúrdeli mindetter árqashan qyzyq ári erekshe», – dep moiyndady ol.
Sonymen qatar, Jetisý aýdany Ardagerler keńesiniń tóraiymy Tamara Shákirova sharanyń Eńbek mamandyqtary jyly aiasynda ótip jatqanyn atap ótti:
«Jetisý aýdanynda qoǵamdyq tamaqtaný oryndary óte kóp shoǵyrlanǵan. Búgin shyǵys ashanasynyń aspazdary óz sheberligin kórsetti. Mundai erekshe taǵam daiyndaý – naǵyz óner. Biz eńbek mamandyqtaryn laiyqty baǵalaýymyz kerek», – dedi ol.
Sharany Jetisý aýdany turǵyndary men etnomádeni ortalyqtary Qazaqstan halqynyń birligi kúnine orai uiymdastyrdy. Aýdan ákimdigi atap ótkendei, laǵman jai ǵana dámdi taǵam emes, ol ortaq mádeni esteliktiń, dástúrdiń, tarihtyń jáne bolashaqtyń simvolyna ainaldy.
