Músin avtory, áigili sýretshi-músinshi Pavel Shorohov Almaty ákimi Baqytjan Saǵyntaevtyń ótinishin qabyl aldy. Ol buzaqylardyń qolynan zardap shekken kompozitsiiany bastapqy qalpyna keltirýdi qolǵa aldy, dep habarlaidy "Ult aqparat".
Almaty ákimi Baqytjan Saǵyntaev Instagram paraqshasynda pannonyń almatylyqtar úshin súiikti sáýlet beineleriniń birine ainalǵanyn jazdy.
«Túieler» sándi-bederli pannosynyń avtory, músinshi Pavel Shorohov kompozitsiiany bastapqy qalpyna keltirý týraly ótinishimdi maquldady. 1982 jyly jasalǵan panno «Dostyq» skverinde tur. Búginde ol almatylyqtardyń súiikti arhitektýralyq beineleriniń birine ainaldy», – dep jazdy B. Saǵyntaev.
Almaty ákimi Pavel Shorohov Almatynyń vizit kartochkasyna ainalǵan birqatar músinniń avtory ekenin eske saldy.
Olar — Arbatta turǵan «Oiyndaǵy balalar», «Flamingo», «Lotos», sondai-aq Qazaq memlekettik tsirkiniń janyndaǵy «Akrobatka», «Pantera», «Saiqymazaq» jáne taǵy basqa týyndylar.
Onyń jumystary Qazaqstan, Resei, Germaniia, Avstriia, Italiia mýzeilerine qoiylǵan.
Pavel Shorohovtyń aitýynsha, qazir ol syrtqy qabyqty qalpyna keltirý jumysymen ainalysyp jatyr.
«Kórip turǵandaryńyzdai, mys qabyqtyń oń jáne sol jaq shetteri julynyp qalǵan. Kóp ziian keltirilgen. Mys qabatynyń shamamen úshten bir bóligi zaqymdalǵan. Modeldiń ózi temirbetonmen qurastyrylǵan», - dep túsindirdi avtor.
Sonymen qatar, ol pannony qalpyna keltirý qiyn ekenin, ony jóndeýge shamamen on kún qajet ekenin atap ótti.
