Almatyda kópqabatty úide gaz jarylyp, 3 adam aýyr jaraqat aldy, dep habarlaidy "Ult aqparat".
«QazTransGaz Aimaq» AQ baspasóz qyzmetiniń málimetine sáikes, Pervomaika aýylyndaǵy Postyshev, 64 «V» mekenjaiynda barak tiptes 3 qabatty úide jarylys boldy. Onda jaldamaly páterlerde 12 otbasy turyp jatqan.
Oqiǵa ornyna jetken apattyq-dispetcherlik qyzmettiń habarlaýynsha, jarylys birinshi qabattaǵy №3 páterde bolǵan. Qatty dúmpý úidegi esik-terezeni, ishki qabyrǵalardy qiratqan.
Mamandardyń tekserýinen soń úidegi gaz qazandyǵy qiramaǵany anyqtaldy.
Al qalalyq Qoǵamdyq densaýlyq saqtaý basqarmasynyń aqparatynsha, jedel járdem brigadasy №4 aýrýhanaǵa 3 patsientti jetkizdi.
Úsheýi da qazir jansaqtaý bóliminde jatyr.
«36 jastaǵy er adamnyń denesin 100 paiyz kúiik (3-dárejeli) shalǵan. Ol jasandy tynys alý apparatyna qosylǵan. Naýqastyń jaǵdaiy óte aýyr. 19 jastaǵy qyzdyń denesiniń 85 paiyzyn kúiik (3-dárejeli) shalǵan. Jaǵdaiy óte aýyr. 23 jastaǵy jigittiń beti, aiaq-qoldary kúigen (1-dárejeli). Denesiniń 22 paiyzy zaqymdanǵan. Bul patsienttiń de jaǵdaiy óte aýyr», - dedi basqarmanyń baspasóz qyzmetinen.
