Almatyda kópqabatty turǵyn úilerdi basqarý jáne kútip-ustaý qyzmetterine arnalǵan eń tómengi tarif ulǵaitylady. Jańa sheshim 2026 jylǵy 28 maýsymnan bastap kúshine enedi. Turǵyndar ózgeristi kelesi aida keletin kommýnaldyq tólem túbirtekterinen baiqai alady, dep habarlaidy ult.kz.
Jańa erejege sáikes, turǵyn úidi kútip-ustaýǵa arnalǵan eń tómengi tólem ár sharshy metr úshin 70 teńge bolyp belgilendi. Bul kórsetkish turǵyn úi ieleri kooperativteri (PIK) men múlik ieleri birlestikteri (MIB) qyzmetteri úshin mindetti eń tómengi mólsher sanalady. Mundai tarifti engizý úshin turǵyndardyń kelisimi talap etilmeidi.
Sonymen qatar, turǵyndar jalpy jinalys ótkizip, qajet bolǵan jaǵdaida bul somany odan da joǵary deńgeide bekite alady.
Aita keteiik, 2025 jyly Almaty máslihaty turǵyn úidi kútip-ustaýdyń eń tómengi tarifin bir sharshy metr úshin 40 teńge kóleminde bekitken bolatyn. Osyǵan bailanysty aýdany 60 sharshy metr bolatyn páter iesiniń ai saiynǵy tólemi 2400 teńgeden 4200 teńgege deiin ósedi.
Jinalǵan qarajat turǵyn úilerdiń ortaq múlkin kútip-ustaýǵa baǵyttalady. Atap aitqanda, kireberister men aýlalardy tazalaý, ortaq múlikti jóndeý, jaryqtandyrý júielerin qamtamasyz etý, jylytý maýsymyna daiyndyq, órt qaýipsizdigin saqtaý jáne injenerlik jelilerdi kútip-ustaý jumystaryna jumsalady.
Túbirtekterde bul tólem «Turǵyn úidi kútip-ustaý», «Úidi kútip-ustaýǵa ketetin shyǵyn» nemese soǵan uqsas ataýlarmen kórsetilýi múmkin.
Qoldanystaǵy zańnamaǵa sáikes, atalǵan jarnany páterler men turǵyn emes úi-jailardyń barlyq menshik ieleri tóleýge mindetti. Óz kezeginde úidi basqarýshy uiym turǵyndarǵa ai saiynǵy jáne jyldyq qarjylyq esep berip otyrýy tiis.
Budan bólek, Almatyda turmystyq qatty qaldyqtardy shyǵarý qyzmetiniń tarifi de ózgeredi. Jańa mólsherleme boiynsha bir adamǵa shaqqandaǵy tólem 718,5 teńgeden 745 teńgege deiin ósedi.
