Almatyda Táýelsizdiktiń 30 jyldyǵyna orai eldiń áleýmettik-ekonomikalyq jáne mádeni damýyna, halyqtar arasyndaǵy dostyq pen yntymaqtastyqty nyǵaitýǵa úles qosqan azamattar memlekettik nagradalarmen marapattaldy, dep habarlaidy QazAqparat.
«Almaty – Táýelsizdiktiń altyn besigi» atty saltanatty sharaǵa QR Parlamenti Senatynyń Tóraǵasy Máýlen Áshimbaev pen Almaty ákimi Baqytjan Saǵyntaev qatysty.
M. Áshimbaev pen B. Saǵyntaev el men qalanyń damýyna erekshe úles qosqan almatylyqtarǵa Prezidenttiń atynan memlekettik nagradalardy tapsyrdy.
Qazaqstan Jazýshylar odaǵynyń tóraǵasy Ulyqbek Esdáýlet III dárejeli «Barys» ordenimen, Eńbek ardageri Q. Baikenov pen Almaty qalasy boiynsha SEBD basshysy J. Bekshin «Parasat» ordenimen marapataldy. I dárejeli «Dostyq» ordeni «KIMEP» ýniversitetiniń rektory Ch.I. Bengke tapsyryldy.
Memlekettik nagradalarmen ǵylym men bilim, mádeniet jáne densaýlyq saqtaý qairatkerleri, memlekettik qyzmetkerler men qalanyń tynys-tirshiligin qamtamasyz etetin qurylys kompaniialary men uiymdarynyń qyzmetkerleri marapattaldy.
Qala ákimi Baqytjan Saǵyntaev tarihi turǵydan Táýelsizdiktiń besigine ainalǵan megapolistiń erekshe rólin atap ótti.
«Almatyda el úshin mańyzdy sheshimder qabyldandy, Konstitýtsiia, memlekettik rámizder qabyldandy, Qarýly Kúshter quryldy, ulttyq valiýta engizildi. Tuńǵysh Prezident sailaýynyń jalpyhalyqtyq nátijeleri de Almatyda jariialandy. 1998 jyly Tuńǵysh Prezident «Almatynyń erekshe mártebesi týraly» Zańǵa qol qoidy», - dedi Baqytjan Saǵyntaev.
Qala ákimi almatylyqtardyń, ásirese aǵa býynnyń megapolisti damytýǵa qosqan úlesin tilge tiek etti.
«Qazaqstan Táýelsizdiginiń 30 jyldyq mereitoiy – bizdiń árqaisymyz úshin mańyzdy oqiǵa. Osy jyldar ishinde ulttyq rýh nyǵaidy, urpaqtar sabaqtastyǵy damydy, qazirgi tarih paida boldy. Búgin biz «Máńgilik El» jalpyulttyq birlik, beibitshilik pen kelisim ideiasyn ustana otyryp, memleket quryp jatyrmyz. Biz Táýelsizdikti armandaǵan ata-babalarymyz salǵan jolmen kelemiz», - dedi ol.
Senat Tóraǵasy Máýlen Áshimbaev Tuńǵysh Prezident – Elbasy Nursultan Nazarbaevtyń saiasatynyń arqasynda elimiz halyqaralyq qoǵamdastyqtyń tolyqqandy jáne yqpaldy múshesine ainalǵanyn, jańa astana salynǵanyn, elimizdiń óńirleri de qarqyndy damyǵanyn atap ótti.
«Táýelsizdik jyldarynda Almaty damýǵa aitarlyqtai serpin aldy. Búginde bul tek Qazaqstannyń ǵana emes, búkil postsovettik keńistiktiń eń serpindi damyp kele jatqan jáne ekonomikalyq qýatty qalalarynyń biri. Elimizdegi árbir besinshi kásipker Almatyda jumys isteidi», - dedi Máýlen Áshimbaev.
Spikerdiń aitýynsha, Almatyda sapaly adami kapital shoǵyrlanǵan.
«Munda bolashaq ekonomikasynyń «jańǵyrtý ózegi»: kreativti tap pen belsendi azamattyq qoǵam qalyptasty. Megapoliske elimizdiń ár óńirinen talanttar aǵylyp kelip jatyr. Almaty – ǵylymi-zertteý jáne tájiribelik-konstrýktorlyq jumystarǵa investitsiialar boiynsha kóshbasshy. Memleket basshysy atap ótkendei, Almatynyń kreativti ekonomikany damytý jónindegi tájiribesin búkil elge taratý qajet», - dedi Máýlen Áshimbaev.
