Buǵan deiin jelide 39 jastaǵy Natalia Iakovlevanyń aiaq astynan joǵalyp ketkeni týraly aqparat taraǵan. Ol - almatylyq tanymal advokat Aleksei Balakinniń jary, dep habarlaidy Vaq.kz aqparat agenttigi.
Advokattyń dostary Facebook arqyly joǵalǵan áieldi tabýǵa kómektesýdi suraǵan. Olar Natalianyń joǵalýyn kúieýiniń qyzmetimen bailanystyrdy, dep jazady «NewTimes.kz» portaly.
Dostary áieldi úiiniń qasyndaǵy turaqta turǵan kólikten urlap ketti degen aqparat taratty. Ol kezde kúieýi bir sharýamen birneshe minýtqa kólikten túsip ketken. Aleksei qaityp kelse, áieli kólikte joq bolady. Uialy telefony sóndirýli. Sodan soń ol týystary men dostaryna, sondai-aq politsiiaǵa habarlasady.
Almaty IID-de Natalia Iakovlevanyń joǵalý faktisine qatysty túsinikteme berdi. Kúieýi habarlasqannan keiin birneshe saǵat ótken soń Brýsilovskii kóshesiniń boiynda ornalasqan kóp qabatty úidiń aýlasynan N. Iakovlevanyń máiiti tabyldy. Onyń denesinde eshqandai zorlyq belgileri bolmaǵan.
«Baqylaý kameralaryndaǵy derekterge súiensek, áiel jalǵyz ózi úige kirip, liftke mingen. Keiin jetinshi qabattyń podezindegi balkonnan qulaidy», - dep naqtylady politsiia ókilderi.
Quqyqqorǵaý organdarynyń habarlaýynsha, sot-meditsinalyq saraptama júrip jatyr.
Aleksei Balakinniń dostary men áriptesteri sýitsid bolýy múmkin degenge senbeidi. Olar qaitys bolǵan áieldiń otbasyn úlgili dep esepteidi. Otbasynda eshqandai problema bolmaǵan.
Natalia Iakovlevanyń artynda kishkentai eki balasy qaldy.
