Almatyda turǵyn úi kezeginde turǵan taǵy eki myńǵa jýyq otbasy jaqyn arada jalǵa beriletin páterge qol jetkizýi múmkin. Sonymen qatar biyl «Almaty jastary» baǵdarlamasyna qatysýǵa tórt myńǵa jýyq jas maman maquldaý aldy. Bul týraly Óńirlik kommýnikatsiialar qyzmetinde ótken brifingte «Otbasy bank» AQ Almaty qalalyq filialy direktorynyń orynbasary Kámshat Ońalbaeva málimdedi, dep habarlaidy ult.kz.
Spikerdiń aitýynsha, ulttyq damý institýty mártebesin alǵannan keiin bank memlekettik turǵyn úi bólý júiesin túbegeili jańartqan. Buǵan deiin ár óńirde bólek júrgizilgen turǵyn úi kezekteri bir júiege biriktirilip, túgendelgen. Sonymen qatar turǵyn úidi ashyq ári avtomatty túrde bóletin «Turǵyn úimen qamtamasyz etý ortalyǵy» aqparattyq júiesi iske qosylǵan.
«Qazir turǵyn úi adam faktorymen emes, azamattyń kezekke qoiylǵan kúni men jeńildik sanatynyń basymdyǵyna qarai avtomatty túrde bólinedi. Tsifrlandyrýdyń arqasynda jyl saiyn bólinetin turǵyn úi kólemin úsh esege deiin arttyra aldyq», – dedi Kámshat Ońalbaeva.
Almatyda kimder baspanaly boldy?
Ótken jyldyń qazan aiynan biylǵy maýsym aiyna deiin respýblika boiynsha 22 856 otbasy turǵyn úimen qamtamasyz etilgen. Onyń ishinde azamattar jalǵa beriletin baspanaǵa ie bolǵan nemese jyldyq 2 jáne 5 paiyzdyq jeńildetilgen nesie arqyly úi satyp alý múmkindigin alǵan.
Jalpy elimiz boiynsha ákimdikter «Otbasy bankke» 29 268 turǵyn úi tapsyrǵan. Onyń:
17 985-i – jalǵa beriletin turǵyn úi;
11 283-i – nesielik turǵyn úi.
Almaty qalasynyń ákimdigi bankke segiz turǵyn úi kesheninen 816 páter bergen. Búginde 516 azamat jaldaý sharttaryna qol qoiyp, jańa baspanaǵa kóshýge daiyndalyp jatyr. Qalǵan páterler boiynsha qujattardy rásimdeý jalǵasýda.
Spiker jańa júieniń naqty nátijelerin de mysalmen túsindirdi. Onyń aitýynsha, jańa qonystanýshylardyń arasynda eki jasynan bastap «jetim balalar» sanaty boiynsha turǵyn úi kezeginde turǵan 19 jastaǵy almatylyq azamat bar. Sondai-aq byltyr ǵana jeke sanat retinde engizilgen «jesirler» sanaty boiynsha alǵash ret 64 adam baspanaly bolǵan.
Budan bólek, Almatyda:
166 jetim bala;
176 múgedektigi bar azamat;
249 kópbalaly jáne tolyq emes otbasy;
erekshe qajettiligi bar bala tárbielep otyrǵan 135 otbasy turǵyn úimen qamtamasyz etilgen.
Kámshat Ońalbaevanyń aitýynsha, jaqyn ýaqytta Almaty qalasynyń ákimdigi «Otbasy bankke» taǵy 1 971 jalǵa beriletin páterdi tapsyrady.
Onyń ishinde:
1 595 páter – halyqtyń áleýmettik osal toptaryna;
376 páter – turǵyn úi kezegindegi ózge azamattarǵa arnalǵan.
Bul taǵy eki myńǵa jýyq almatylyq otbasynyń turǵyn úi máselesin sheshýge múmkindik beredi.
«Almaty jastary» baǵdarlamasyna 4 myńǵa jýyq adam maquldaý aldy
Brifingte biyl 10 jyldyǵyn atap ótip jatqan «Almaty jastary» baǵdarlamasynyń nátijeleri de jariialandy.
1–15 maýsym aralyǵynda baǵdarlamaǵa qatysý úshin 5 363 ótinim qabyldanǵan. Qujattardy tekserý qorytyndysy boiynsha 3 968 jas mamanǵa maquldaý berilgen.
Olardyń qatarynda:
muǵalimder;
dárigerler;
jas ǵalymdar;
jýrnalister;
kommýnaldyq qyzmetkerler;
mádeniet salasynyń mamandary;
quqyq qorǵaý organdarynyń qyzmetkerleri jáne basqa da suranysqa ie mamandyq ieleri bar.
Baǵdarlama aiasynda:
eń joǵary nesie somasy – 20 mln teńge;
bastapqy jarna – 10%;
nesie mólsherlemesi – jyldyq 5%.
Qatysýshylar bastapqy jáne qaitalama naryqtan turǵyn úi satyp ala alady. Sondai-aq Qazaqstan turǵyn úi kompaniiasynyń kepildigi bolǵan jaǵdaida salynyp jatqan turǵyn úiden de baspana alýǵa múmkindik bar.
Spikerdiń málimetinshe, baǵdarlama iske asqan 10 jyl ishinde Almatynyń 8 326 jas turǵyny baspanaly bolǵan. Osy ýaqyt aralyǵynda berilgen turǵyn úi zaemdarynyń jalpy kólemi 179,2 mlrd teńgeni qurady.
«Almaty jastary» baǵdarlamasy alǵashqy jyly nebári 100 adamdy qamtysa, ótken jyly jeńildetilgen nesie alǵan jastar sany 2 276-ǵa jetken. Bul baǵdarlamanyń qala jastary arasynda joǵary suranysqa ie ekenin kórsetedi.
