Foto: ktk.kz
Almatyda sýrrogat ana Qytaidan kelgen erli-zaiyptydan óz qyzmeti úshin ýáde etilgen aqshasyn ala almai otyr. Aitýynsha, tapsyrys bergen tarap shala týǵan baladan bas tartyp ketken. Áiel bul jaǵdai boiynsha politsiiaǵa júgingen, dep habarlaidy Ult.kz KTK telearnasyna silteme jasap.
27 jastaǵy Kristina Gavriliýk qarjylyq sebeppen sýrrogat ana bolýǵa kelisim bergen. Kelisim boiynsha oǵan 7,5 million teńge syiaqy tólenýi tiis bolǵan. Embrion Almatydaǵy klinikalardyń birinde salynǵan.
Júktilik kezinde bolashaq ata-ana kelisilgen tólemderdi ýaqytyly berip, ai saiyn shamamen 200 myń teńge tólep otyrǵan. Alaida júktilik asqynǵandyqtan, Kristina jetinshi aida merziminen buryn bosanǵan. Osydan keiin klientter shala týǵan uldy alýdan bas tartqan.
Sýrrogat ananyń aitýynsha, kesar tiliginen keiin sábidi birden alyp ketken. Biraz ýaqyttan soń meditsina qyzmetkeri balanyń qaitadan ózine tapsyrylǵanyn aitqan. Buǵan deiin biologiialyq ata-ana balanyń densaýlyǵyn tekserý úshin túrli analizder men DNQ-test júrgizýdi talap etken. Tekserý nátijeleri balanyń olardyń biologiialyq uly ekenin rastaǵan.
Alaida osydan keiin tapsyrys berýshiler bailanysqa shyqpai qoiǵan. Keiinirek kýrator arqyly balany alyp ketýden bas tartatynyn jetkizgen.
Kristina Gavriliýk dúkende satýshy bolyp jumys isteidi, onyń alty jastaǵy qyzy bar. Buǵan deiin ol eki ret sýrrogat ana bolyp, eki jaǵdaida da kelisim sátti aiaqtalǵan. Al úshinshi ret ýáde etilgen syiaqyny ala almaǵan.
Áiel bóten balany tárbieleýge daiyn emes ekenin aityp, bosanǵannan keiin náresteden bas tartý týraly ótinish jazǵan.
Biologiialyq ata-analar týraly aqparat az. Olar Qytai azamattary ekeni belgili. Qazirgi ýaqytta olardyń qaida júrgeni belgisiz. Al protsedýra júrgizilgen klinika bul jaǵdaiǵa qatysty túsinikteme berýden bas tartqan.
Almaty qalalyq politsiia departamentiniń resmi ókili Saltanat Ázirbektiń aitýynsha, tekseris nátijesinde qylmystyq nemese ákimshilik quqyqbuzýshylyq belgileri anyqtalmaǵan.
Osyǵan bailanysty qylmystyq is qozǵaýdan bas tartylyp, máseleni azamattyq-quqyqtyq tártippen sot arqyly sheshý usynylǵan.
Qazaqstanda sýrrogat ana bolý zańmen ruqsat etilgen. Bul qatynastar «Neke jáne otbasy týraly» zańmen retteledi. Zańǵa sáikes, sýrrogat ananyń meditsinalyq kómek alýǵa, densaýlyǵyn qorǵaýǵa jáne kelisilgen syiaqyny alýǵa quqyǵy bar.
Quqyq qorǵaýshylardyń aitýynsha, áiel sotqa júginip, óz quqyǵyn qorǵaýǵa tyrysýy kerek. Al biologiialyq ata-ana shetel azamattary bolǵandyqtan, Qytai elshiligi men Syrtqy ister ministrligine júginý usynylǵan.
Zańger Ǵabit Ómirbekovtiń pikirinshe, biologiialyq ata-anaǵa qatysty ata-analyq mindetterin oryndamaý deregi boiynsha qylmystyq is qozǵaý máselesin qarastyrýǵa bolady.
Qazir jańa týǵan sábi balalar úiinde. Dárigerler onyń jaǵdaiyn turaqty dep baǵalap otyr. Náreste salmaq qosyp keledi. Bala ata-anasy bas tartqan balalar sanatyna jatqyzylyp, onyń taǵdyryna qatysty jaýapkershilikti memleket óz moinyna alǵan.
