Foto: Almaty ákimdigi
Almaty ákimi Erbolat Dosaev jańa oqý jylyna daiyndyq jáne stýdentterdi jataqhanaǵa ornalastyrý máselesi boiynsha joǵary oqý oryndarynyń rektorlarymen kezdesti, dep habarlaidy "Ult aqparat" Kazinform aqparat agenttigine silteme jasap.
«Elimizdiń mańdaialdy oqý oryndarynyń deni Almatyda ornalasqan, jyl saiyn myńdaǵan stýdent joǵary bilim alý úshin osynda keledi. Bizdiń mindetimiz – olarǵa sapaly bilim berý jáne jaily jataqhanamen qamtamasyz etý», – dedi qala ákimi Erbolat Dosaev.
Aitýynsha, almatylyq stýdentterdi jataqhanaǵa ornalastyrý boiynsha arnaiy shtab quryldy. Budan bólek, daǵdarys jáne jedel den qoiý jónindegi ahýaldyq ortalyqtar jumys isteidi.
Daǵdarys ortalyǵy ALT ýniversitetinde ornalasqan. Onyń mindeti basqa óńirden kelgen stýdentterge jedel qoldaý kórsetý jáne ýaqytsha ornalastyrý. Daǵdarys ortalyǵynda 70 oryn bar.
Ahýaldyq ortalyǵy Almaly aýdanyndaǵy jastardyń komiýniti ortalyǵynyń bazasynda jumys isteidi. 1 tamyzdan bastap ortalyq táýlik boiy jumys istep, stýdentterge ornalastyrý máselesi boiynsha jedel kómek kórsetýde. Ortalyq kún saiyn Qazaqstannyń túkpir-túkpirinen 1,5 myńnan astam qońyraý qabyldaidy.
Sonymen qatar, qalanyń árbir joǵary oqý ornynda stýdentterge tikelei qoldaý kórsetetin Ahýaldyq ortalyqtar ashyldy.
Aita ketetin nárse, Almatydaǵy 35 joǵary oqý ornynda 199 myńnan astam stýdent bilim alyp jatyr, onyń 124 myńy – ózge óńirden kelgen stýdentter. Qalada 109 stýdenttik jataqhana bar, onda 36,2 myńnan astam stýdent turady. Jalpy qajettilik 28,7 myń oryn.
Alaida qala ákimi qoldaýymen qabyldanǵan sharalardyń nátijesinde tamyz aiynyń sońynda tósek oryn tapshylyǵy 8,9 myń orynǵa deiin qysqardy.
Oqý jyly bastalǵanǵa deiin Almatyda 1920 oryndyq 6 jataqhana ashylady, al jyl sońyna deiin Almaty qalasy ákimdiginiń jobalyq keńsesiniń qoldaýymen 3105 stýdentke arnalǵan 4 jataqhanany paidalanýǵa berý josparlanyp otyr.
2024 jyly 10 jataqhana, 2025-2026 jyldary 33 jataqhana paidalanýǵa berilmek.
Esterińizge sala keteiik, jataqhana qurylysyn tiimdi úilestirý úshin stýdenttik jataqhanalar qurylysy boiynsha jobalyq keńse jumys istep tur. Jobalyq keńseniń negizgi mindeti Almaty qalasynda jataqhanalar qurylysy boiynsha memlekettik baǵdarlamany iske asyrý jáne stýdentterdi turǵyn úimen qamtamasyz etý úshin qolaily jaǵdai jasaý. Jobalyq keńse ashylǵannan bastap 120 áleýetti investor júgindi, onyń 67-si qazir jumysqa kirisken, bul qoldaý mehanizminiń tartymdylyǵyn kórsetedi.
Shahar basshysy jataqhana máselesi tikelei baqylaýynda ekenin atap ótti.
