Balalary oqý grantyna iline almaǵan ata-analar men jattyqtyrýshylar narazylyq tanytty. Aitýlarynsha, kishkentaiynan sportpen ainalysyp, el namysyn qorǵap kelgen oqýshylar bilim jáne ǵylym ministrligi ózgertken baptyń kesirinen oqýǵa túse almaǵan, dep habarlaidy almaty.tv.
Tyǵyryqqa tirelgen talapkerler osy ýaqytqa deiin eńbektenip jetken ataq-dárejeleriniń eskerýsiz qalǵanyna qapaly. Al myqty mamandardy daiyndaityn akademiianyń basshylary grantqa túskenderdiń kóbi sportqa qatysy joq jandar dep otyr.
Tobymen birge tyǵyryqqa tirelip turǵan jastardyń bir bóligi – respýblikalyq sport mektebiniń túlekteri. Áýpirimdep damyp kele jatqan bessaiys túrin erkin meńgergen qyz-jigitter osy ýaqytqa deiin Ózbekstan, Tailand, Resei syndy kóptegen elderde ótken halyqaralyq jarystardan talai márte top jarǵan. «Sanaty joǵary básekeden júlde alyp, el namysyn qorǵasaq, oqýǵa da jol ashylady degen úmitimizdiń úzilgenine ókpelimiz» deidi sportshylar.
«Men bessaiystan jastar arasynda Qazaqstan chempiony, Aziia oiyndarynda jeńimpaz atandym. Qazan aiynda jasóspirimder arasynda ótetin Olimpiadaǵa qatysamyn. 114 ball jinasam da, grantqa ilikpedim», – deidi Ádil IBRAGIMOV.
«Biz bessaiystan Aziia chempiony boldyq. Osy ýaqytqa deiingi eńbegimiz úshin osy oqý ornynda oqityn shyǵarmyz degen edik. Grantty qysqartqandyqtan, eshqaisymyz túse almadyq. Biz de bilimimizdi ary qarai jalǵastyrǵymyz keledi», – dedi LIýDMILA IaNOVIEVA.
Balalary grantqa ilinbei qalǵan ata-analar Týrizm jáne sport akademiiasynyń aldynda tańnan jinalyp, taǵattarynyń taýsylǵandyǵyn, tyǵyryqqa tirelgen balalaryna biliktiń kómek kórsetýin surady. Shákirt tárbielep kele jatqan jattyqtyrýshylar da jaǵdaidyń qiyn ekenin jetkizdi.
«Meniń balam sporttyń voleibol túrimen ainalysqan. Qazaqstan boiynsha bes dúrkin chempion atanǵan. Halyqaralyq jarystardyń chempiony. KMS qorǵap aldy. Meniń joǵary jaqtan suraitynym, sport salasynda júrgen jasóspirimderge kóńil bólinse eken deimin. Óitkeni, olar Qazaqstanymyzdyń bolashaǵy», – deidi ata-ana Qanaǵat ÁBDIRASYLULY.
Týrizm akademiiasyna jinalǵan talapkerlerdiń kóbi bergisi – aýdan, arǵysy – jasóspirimder arasynda ótken halyqaralyq básekelerden jeńimpaz atanǵandar. Biraq shilde aiynda bilim týraly zańǵa engen ózgeris olardyń kóp jylǵy eńbekterin joqqa shyǵardy deidi akademiia basshylyǵy. Bir ai buryn ǵana taraǵan talap boiynsha, 26-baptyń 5-tarmaǵyna sáikes, jalpy bilim beretin mektepterdegi túlekterden kim joǵary ball jinasa sol grantqa ilinedi.
«1122 talapker-sportshy tirkelgen bolatyn. 1 myń 122 adamnyń, joǵarǵy jetistiktegi sportshylardyń 107-si ǵana osy 450 granttan alyp otyr. Iaǵni, 343 talapkerdiń daiyndyq deńgeii tómen nemese keibireýiniń sportqa qatysy joq dep aitýǵa bolady. Iaǵni, olar balynyń joǵary bolýyna bailanysty osy bilim granttaryn iemdenip otyr. Árine, bul keri áserin tigizetini sózsiz. Sebebi, túspei qalǵandardyń kópshiligi – kishkentai kezinen bastap sporttyń qyr-syryn meńgergen balalar», – dedi Qazaqtyń sport jáne týrizm akademiiasynyń prorektory Muhtar ESQALIEV.
Akademiia basshylary men jattyqtyrýshylarynyń aitýynsha, biylǵy jylǵa deiin halyqaralyq jáne respýblikalyq jarystardyń jeńimpazdary atanǵan joǵarǵy dárejedegi sportshylar oqýǵa túskisi kelse, olardyń jetistigine basymdyq berilip kelgen. Aldaǵy ómirlerin tek Sport akademiiasynda jalǵastyrǵysy kelgen talapkerler tym bolmaǵanda, aqyly oqýǵa jeńildik jasalsa deidi.
