Shaǵyn jáne orta biznes nysandary jyl sońyna deiin meditsinalyq saqtandyrý tólemderinen bosatyldy. Bul týraly «Áleýmettik meditsinalyq saqtandyrý qory» KEAQ Almaty qalalyq filialynyń baspasóz qyzmeti málimdedi, dep habarlaidy "Ult aqparat".
QR Prezidentiniń 14 qyrkúiektegi №413 Jarlyǵy boiynsha ekonomikanyń pandemiiadan meilinshe zardap shekken salalaryndaǵy shaǵyn jáne orta biznes nysandary biýdjetten tys qorlarǵa tólenetin tólemderden bosatylǵan.
Biznes sýbektilerine buǵan deiin de 2020 jyldyń sáýiri men qazan ailary aralyǵynda alty ailyq jeńildik berilgen bolatyn.
«Salyqtar men áleýmettik tólemderdi tóleý mindetinen bosatylǵan ShOB nysandarynyń tizimi kóktemde jasalǵan bolatyn. Olardyń qatarynda saýda-sattyq, kólik jáne tehnikalyq qyzmet kórsetý, bilim, meditsina, týrizm, meiramhana-qonaq úi biznesi, oiyn-saýyq, baǵdarlamalyq qamsyzdandyrý nysandary, fitnes klýbtary bar. Endi biznesti qoldaý maqsatynda jeńildik merzimi jyl sońyna deiin uzartylyp otyr», - dedi filial direktory Tileýhan Ábildaev.
Tólemderden bosatylǵan jumys berýshiler qaramaǵyndaǵy qyzmetkerlerin saqtandyrýmen qamtamasyz etýdi esten shyǵarmaǵany jón. Qyzmetkerler MÁMS paketine enetin meditsinalyq qyzmet túrlerin kedergisiz alýy úshin olardyń tizimin Qordyń aqparattyq júiesine engizip, ýaqtyly jańartyp otyrýy tiis.
Esterińizge sala ketsek, Almaty boiynsha 116 604 shaǵyn jáne orta biznes nysanyna jeńildik berilgen.
Jalpy, jumysshylarǵa qatysty málimetti bir ret engizse jetkilikti. Aldaǵy ýaqytta jumysqa jańadan alynǵan jáne jumystan shyqqan qyzmetkerler jaily málimetti engizip otyrý qajet. Aqparat ai saiyn Memlekettik kiris komitetine joldanady.
